Ishki ister mınıstriniń orynbasary Aıdar Saıtbekov Aqtóbe oblysyna bardy. Issapar barysynda polısııa departamentiniń jeke quramymen kezdesý ótkizdi. Jıynda mınıstrdiń orynbasary jumystyń aýqymdylyǵyn atap ótip, qoǵamdaǵy qylmys pen quqyq buzýshylyqqa qarsy kúrestegi mindetterdi taǵy bir márte túsindirdi. Sondaı-aq erlikpen qaza tapqan polıseıdiń esimin ulyqtaý rásimine qatysty.
Basqosýda Aıdar Saıtbekov quqyq qorǵaý organdarynyń qyzmetin jetildirý máselelerine egjeı-tegjeı toqtaldy. Sóz arasynda ol qoǵam aldynda polısııa otandastarymyzdyń senimdi ári qorǵanysh tiregi retinde qabyldanýy tıis ekenin atap ótti.
«Qaýipsizdikti qamtamasyz etý salasyndaǵy máselelerdi birlesip anyqtaý jáne sheshý úshin polıseılerdiń azamattarmen tıimdi seriktestik qarym-qatynas ornatýy qajet. Árbir tártip saqshysy antqa adal bolýy kerek, kúndelikti jumysta zańdy qatań ustanýy kerek», dedi Ishki ister mınıstriniń orynbasary.
Issapar barysynda ókil Shubarshyda qaza bolǵan arnaıy jasaq jaýyngeri Rýslan Joldybaevtyń atyndaǵy kabınet ashylýyna qatysty. Batyrdyń erligi men janqııarlyǵyn aıshyqtaý jáne máńgi úlgi etý maqsatynda ótkizilgen sharaǵa Aqtóbe oblysy polısııa departamentiniń basshylyǵy men jeke quramy, IIO ardagerleri, oblys ákiminiń orynbasary, mektep ujymy, batyrdyń otbasy – anasy, jary men qyzy, sondaı-aq oqýshylardyń ata-analary qatysty.
«Qazaqta «Ulym deıtin el bolmasa, elim deıtin ul qaıdan bolsyn» degen qanatty sóz bar. Elim dep ezilip, janyn qıǵan Rýslannyń erligi – boıymyzda sheksiz qurmet pen maqtanysh sezimin uıalatsa, ekinshi jaǵynan onyń qaıǵyly qazasy qabyrǵamyzdy qaıystyrady. El úshin týyp, el úshin janyn qıǵan erimizdiń esimin ulyqtaý jáne úlgi etý maqsatynda oblys ákimdiginiń qoldaýymen ashylyp otyrǵan bul synyptyń órenderi bolashaqta eline adal qyzmet etetin azamattar bolaryna senimimiz mol», dep Aqtóbe oblysy polısııa departamentiniń bastyǵy Abaı Júsipov batyrdyń anasy men otbasyna qoldaý sózderin arnap, alǵyshat pen gúl shoqtaryn tabystady.
Aqtóbe oblysy PD arnaıy maqsattaǵy bólinisiniń aǵa ınspektory Rýslan Baqqalıuly Joldybaev 2011 jyldyń 1 shildesinde Temir aýdanynda eki polısııa qyzmetkeriniń ómirin qıǵan qarýly dinı estremıstik sıpattaǵy qylmystyq toppen betpe-bet atys kezinde joldastaryn qorǵaı otyryp, aýyr dene jaraqatyn alsa da, joldastary shegingenshe atysty toqtatpaı, qandyqol qylmyskerler qolynan erlikpen qaza tapqan. Keıin Prezıdent Jarlyǵymen «Aıbyn» ordenimen marapattaldy.
«Qaısar bolmys pen antyna adaldyqtyń aıqyn úlgisi bolǵan Rýslan Joldybaevtyń erligi máńgi este. Osy maqsatta ózi oqyǵan Aqtóbe qalasyndaǵy №13 orta mektepte batyrdyń atynda alǵashqy áskerı daıyndyq synyby ashylyp otyr. Bul – eń aldymen, ókshe basyp, aǵa býynnyń izin jalǵaıtyn jastarǵa úlgi ónege. Ári esepsiz erlikti tarıhta qaldyrýdyń bir tetigi», dedi Ishki ister mınıstriniń orynbasary.
6-synyptyń 25 oqýshysy tájirıbeli tártip saqshylarynyń aldynda maqtanyshpen ári tolqynys sezimimen saltanatty túrde adaldyq antyn berip, Rýslan Joldybaev atyndaǵy synypqa resmı túrde qabyldandy. Sonymen qatar is-sharada polısııa departamentiniń jáne №13 orta mekteptiń basshylyǵy ózara yntymaqtastyq týraly memorandýmǵa qol qoıyp, aldaǵy aýqymdy jumystyń birlesken baǵytyn aıqyndady.
Aıta keteıik, táýelsizdik alǵan jyldardyń ishinde elimizde Ishki ister organdarynyń 817 qyzmetkeri qyzmet babynda qaza bolǵan.