«AI'preneurs» atty jańa formattaǵy akselerasııa baǵdarlamasynyń qatysýshylary anyqtaldy. Aıta keteıik, «AI'preneurs» – jasandy ıntellekt baǵytyndaǵy ınnovasııalyq startaptardy birlesip qurýǵa baǵyttalǵan baǵdarlama. Atalǵan jobada geografııalyq shekteý joq, demek álemniń túkpir-túkpirindegi ınjenerler, derekterdi taldaýshylar, ónim menedjerleri men ózge de IT-mamandary qatysa alady.
Baǵdarlama oflaın formatta Astana qalasynda ótedi. Al ózge qalalar men shet memleketten kelgen qatysýshylar turǵyn úımen qamtylady. Tórt aıǵa sozylatyn baǵdarlamada oqytý, startap-jobalardy ázirleý boıynsha sala sarapshylary jeke keńes beredi.
«Jańa zamanda jasandy ıntellekt bıznesten bastap medısına men bilimge deıingi ómirimizdiń ártúrli salasymen bite qaınasyp ketti. AI'preneurs-tiń qundylyǵy – ıdeıa paıda bolǵan sátten bastap, naryqta sátti júzege asqanǵa deıin startaptardyń shyńdalýyna tolyq jaǵdaı jasaıdy. Baǵdarlama aıasynda bilikti tálimgerler men úılestirýshiler jobalardyń damýyna tikeleı qoldaý kórsetip, turaqty ilgerileýin baqylaıdy. Qatysýshylar mamandanǵan sarapshylarǵa júginip, óz ónimine qatysty jeke keńester alady. Sonymen qatar komandalardyń tehnıkalyq jabdyqtalýyna tolyq jaǵdaı jasaımyz», dedi «Astana Hub» bıznes baǵdarlamalar ofısiniń dırektory Erbol Ahmetov.
Qazir «AI'preneurs» jobasynyń sońǵy kezeńine ótken qatysýshylary startap-jobalar qurýǵa baǵyttalǵan oqýdy bastady. Komıssııa qaraýyna usynylǵan 250-den astam ótinimniń ishinen áýeli 100 úmitker irikteldi. Keıin solardyń arasynan eń úzdik 50 qatysýshy ǵana baǵdarlamaǵa qatysýǵa joldama aldy. Búginde olar tórt aılyq oqýdy bastady.
Atalǵan baǵdarlama talantty mamandardyń basyn qosyp, jasandy ıntellekt salasyndaǵy ınnovasııalyq startaptardy birlesip qurýǵa baǵyttalǵan. Iriktelgen 50 fınalıst qatarynda aǵa ınjenerler, baǵdarlamalyq jasaqtama qurastyrýshylary, kıberqaýipsizdik mamandary men zertteýshi ınjenerler, sondaı-aq ınnovasııalyq tehnologııalardy ázirleý jáne engizý salasynyń sheberleri bar.
«Básekege toly irikteýden ótken úzdikter baǵdarlamanyń alǵashqy kezeńine kiristi. Qatysýshylardyń mundaǵy mindeti – seriktesterin taýyp, komanda qurý. Olarǵa top pen startap qurý aıasynda túrli vorkshop pen basqa da is-shara uıymdastyrylady. Osylaısha, ár qatysýshy óziniń myqty qasıetin tanyta alady», dedi Erbol Ahmetov.
Eske salsaq, akselerator úsh negizgi kezeńnen turady. Atap aıtsaq, komanda qurý, ınvestısııalyq komıtetpen baılanys jáne ónimdi ázirleý barysy. Birinshi kezeń aıasynda qatysýshylar seriktester taýyp, iriktelgen úmitkerler arasynan komanda qurady. Al ekinshi kezeńde jasaqtalǵan komandalar startap ıdeıasyn oılastyryp, ónimniń prototıpin jasaıdy jáne ony ınvestısııalyq komıtetke usynady. Olardyń jobasy kelesi kezeńge sátti ótse, qarjy bólinedi. Al odaqtasyn tappaǵan qatysýshylar jáne ınvestısııalyq komıtet maquldaýyn almaǵan komandalar baǵdarlamamen qosh aıtysady nemese basqa komandaǵa qosylady. Sońǵy kezeńde startaptar ónim ázirleýge kirisedi.
Baǵdarlamaǵa qatysýshylardyń biri – balalar aýtızmin emdeýdi kózdeıtin onlaın-servıstiń negizin qalaǵan Janbolat Qaıyrǵojın. Onyń platformasy on besten astam eldiń, onyń ishinde Eýropa baldyrǵandaryna qoldaý kórsetedi. Joba tórt jyl ishinde júzdegen balaǵa kómek qolyn sozǵan. Bul kórsetkish jyl saıyn artyp keledi. Janbolat pikirles adamdardy taýyp, «MedTech» platformasyn qurýdy josparlap otyr.
«AI'preneurs aıasynda aýtızmmen aýyratyn balalardy emdeý sharalarynyń sapasyn baqylaýǵa jáne dıagnostıkalaýǵa yqpal etetin platforma qurýdy josparlap otyrmyn. Munda jasandy ıntellekt artyqshylyǵy da qoldanylady. Meniń oıymsha, jumsalǵan somadan myń ese baǵaly qundylyq jasap, uzaqmerzimdi ári ǵalamat dúnıe shyǵarýǵa bolady. Áke retinde balalar densaýlyǵy baǵa jetpes baılyq ekenin túsinemin», dedi J.Qaıyrǵojın.
Jobanyń taǵy bir qatysýshysy – Gúlnaz Jumabek. Ol Kembrıdj ýnıversıtetiniń túlegi, ártúrli naryqta, sonyń ishinde Ulybrıtanııa men Parsy shyǵanaǵy elderinde 15 jyldan astam keńes berý jáne ınvestısııalyq bankıng salasynda eńbek etken. «AI'preneurs» baǵdarlamasy arqyly densaýlyq saqtaý tehnologııalary salasynda startap qurýdy josparlap otyr.
«Astana Hub»-tyń AI’Preneurs baǵdarlamasy – biz úshin taptyrmaıtyn múmkindikter alańy. Munda tálimgerler jobamyzǵa jol siltep, paıdaly aqparatqa qanyq boldyq. Sondaı-aq basqa komandalarmen tájirıbe almasyp jatyrmyz. Qazir men densaýlyqqa arnalǵan eki tehnologııalyq jobada jumys istep jatyrmyn. Alǵashqysy psıhologııaǵa qatysty. Iаǵnı jasandy ıntellekt arqyly ár adamnyń emosıonaldyq ıntellektin anyqtap, keri baılanys ornatatyndaı baǵdarlama jasap jatyrmyz. Al ekinshi jobamyzda biz mashınalyq oqytý ádisimen aýtızmdi erte anyqtaýǵa tyrysamyz», dedi ol.
Baǵdarlama barysynda qatysýshylar jeke mentorlyq qoldaý taýyp, kásipkerlik daǵdylardy damytýǵa yqpal etetin trenıngterge, tehnıkalyq jáne bıznes-máseleler boıynsha sarapshylar keńesterine qol jetkizedi. Sondaı-aq komandalar «Astana Hub» ınfraqurylymyn paıdalanady. Akselerasııanyń barlyq kezeńin sátti aıaqtaǵan qatysýshylar ınnovasııalyq startap-jobalaryn áleýetti ınvestorlarǵa usynyp, ony iske asyrý úshin qomaqty qarjy alady.