Prezıdenttiń «Ádiletti Qazaqstannyń ekonomıkalyq baǵdary» atty Qazaqstan halqyna Joldaýynda berilgen tapsyrmasyn oryndaý maqsatynda Úkimet jol ınfraqurylymyn jaqsartý jónindegi aýqymdy memlekettik baǵdarlamany iske asyryp jatyr, dep habarlaıdy Egemen.kz.
Aıta keteıik, 2024 jyly jol-qurylys jumystarynyń kólemi rekordty 12 myń shaqyrymǵa jetken. Onyń 8 myń shaqyrymy elimizdiń óńirlerin baılanystyratyn strategııalyq mańyzy bar kólik kúre joldaryn qamtamasyz etetin respýblıkalyq joldardy quraıdy. Qalǵan 4 myń shaqyrymy – jergilikti mańyzy bar joldar.
Sonymen qatar bıyl jyl sońyna deıin 7 myń shaqyrym joldyń qurylysy, rekonstrýksııasy jáne jóndeý jumystary aıaqtalyp, paıdalanýǵa beriledi dep josparlanǵan.
«Búgingi tańda, mysaly, «Qaraǵandy – Almaty», «Taldyqorǵan – О́skemen» jáne «Aqtóbe – Atyraý – Astrahan» sııaqty iri kólik kúre joldaryn rekonstrýksııalaý jumystary aıaqtalady. Bul jobalar jol júrý ýaqytyn qysqartady, kólik shyǵyndaryn azaıtady ári jol qaýipsizdigin arttyrady. Atalǵan jobalardyń jalpy uzyndyǵy – 2 myń shaqyrym», dep habarlady Úkimettiń baspasóz qyzmeti.
Vedomstvo málimetinshe, Túrkistan oblysynda uzyndyǵy 840 metr bolatyn Shaqpaq baba asýynda týnnel qurylysy aıaqtalýǵa jaqyn qalǵan. Qurylys aımaq úshin úlken mańyzǵa ıe, óıtkeni asý «Batys Eýropa – Batys Qytaı» kólik dáliziniń kúrdeli bóligi bolyp sanalady. Búginde beton men asfalt tóselip, negizgi qurylys jumystary aıaqtalǵan. Sonymen qatar beınebaqylaý júıelerin, jeldetý jáne órtke qarsy jabdyqtardy ornatý boıynsha iske qosý-retteý jumysy qarqyndy júrgizilip jatqany belgili boldy.
«Kólik ınfraqurylymyn damytýdaǵy taǵy bir mańyzdy obekt – Almaty oblysyndaǵy Shamalǵan stansasynda avtomobıl joly ótpesiniń salynýy. О́tkeldiń ashylýy avtokólikterdiń temir joldardan qaýipsiz ári kedergisiz ótýin qamtamasyz etýi tıis», delingen habarlamada.
Sonymen qatar Qazaqstannyń shyǵysynda uzyndyǵy 1 316 metr Buqtyrma sý qoımasy arqyly ótetin kópir ótkeliniń qurylysy aıaqtalýǵa jaqyn. Bul kópir óńir úshin strategııalyq mańyzǵa ıe, óıtkeni buryn shalǵaı aýdandardyń turǵyndary parom ótkelin paıdalanýǵa májbúr bolǵan.
Sondaı-aq elimizdiń ońtústik jáne ortalyq óńirlerin baılanystyratyn «Qyzylorda – Jezqazǵan» avtojolyn rekonstrýksııalaý jumysy bastalǵan. Odan bólek, «Jezqazǵan – Petropavl», «Qandyaǵash – Shalqar – Yrǵyz», «Qaraǵandy – Aıagóz – Boǵas» jáne «Semeı – Barnaýl» joldary ortasha jóndeýden ótetini habarlandy.