Oblys ortalyǵy Semeı qalasynda «Digital Abai: jańa zamandaǵy bilim berý» atty taqyrypta pedagogterdiń dástúrli tamyz konferensııasy ótti. Onda bilim berý uıymdarynda atqarylǵan jumystarǵa taldaý jasalyp, jańa oqý jylyna daıyndyq máseleleri pysyqtaldy. Bıylǵy jıynda óńirdiń bilim berý júıesin sıfrlyq transformasııalaýǵa basymdyq berildi. Plenarlyq sessııa barysynda sıfrlyq kórme uıymdastyrylyp, onda stýdentter men oqýshylardyń startap-jobalary, STEAM-bilim berý salasyndaǵy ázirlemeler, sondaı-aq oqytý úshin jaıly jáne qaýipsiz sıfrlyq ortany qurýdyń jańa jobalary usynyldy.
Plenarlyq sessııaǵa bilim berý uıymdarynyń pedagogteri men basshylary, psıhologter, ádiskerler men ádistemelik kabınetterdiń meńgerýshileri, jergilikti atqarýshy organdardyń ókilderi, eńbek ardagerleri qatysyp, olar sıfrlandyrýdyń úrdisteri men bilim berý salasynda jasandy ıntellektini qoldaný týraly ózekti máseleler qozǵaldy.
Abaı oblysy bilim basqarmasynyń basshysy Nurjan Ahmetqalıev bilim berý júıesindegi sıfrlandyrýdyń mańyzyna toqtaldy.
– XXI ǵasyr – sıfrlyq tehnologııa dáýiri. Qazir elimizde «Sıfrlyq Qazaqstan» memlekettik baǵdarlamasy aıasynda kóptegen jumys júrgizilip jatyr. El ekonomıkasynda da sıfrlandyrý mańyzdy ról atqarady. Sondyqtan oqýshylardyń sıfrlyq daǵdylaryn damytý maqsatynda birqatar is-shara iske asyryldy. Sonda da sıfrlyq tehnologııalar men quraldardy tıimdi paıdalaný arqyly bilim berý uıymdarynyń jumysyn jetildirý jóninde naqty usynystar kerek, – dedi ol.
Plenarlyq sessııa barysynda bilim berýdi sıfrlandyrý salasyndaǵy jetekshi sarapshylar baıandama jasady. Máselen, Oqý-aǵartý mınıstrligi Y.Altynsarın atyndaǵy Ulttyq bilim akademııasynyń orta bilim mazmuny ınstıtýtynyń dırektory, PhD Seıfolla Smaıylov «Sıfrlandyrý jaǵdaıynda orta bilim berýdiń sapasy men qoljetimdiligin arttyrý» taqyrybyn qozǵasa, «EdCrunch» jańa bilim berý tehnologııalarynyń negizin qalaýshy ári baǵdarlamalyq dırektory Nurlan Qııasov jasandy ıntellektiniń jetistikterin sóz etti. Al «Steam.kz» jobasynyń negizin qalaýshy Aıdyn Túsipjanov «STEAM-bilim berýdi damytý múmkindikterin» talqylap, «Ustem robotics» qorynyń halyqaralyq qatynastar departamentiniń dırektory Nurlybek Nurjanov «Sıfrlyq transformasııa jaǵdaıynda pedagogter men bilim alýshylarǵa qolaıly orta qalyptastyrý mańyzdylyǵy: jetistikter men jeńister» atty taqyrypta baıandama jasady. «Abai it Valley» tehnologııalyq klasteriniń dırektory Baýyrjan Naýryzbaev Abaı oblysynyń stýdentteri men oqýshylarynyń startap-jobalaryn damytýdyń múmkindikteri men alǵashqy nátıjeleri týraly baıandady.
Tamyz keńesi aıasynda «Mektepke deıingi bilim berýdegi ınnovasııalar», «Jasandy ıntellektini orta bilim berý júıesine ıntegrasııalaý», «Tehnıkalyq jáne kásiptik bilim berý júıesindegi sıfrlandyrýdyń qazirgi basymdyqtary», «Aýyldyq mektepterde oqytý prosesin sıfrlandyrý» sekildi taqyryptarǵa bólingen seksııa otyrystaryna qatysqan mamandar óz jumystaryn qorytyndylady.
Sondaı-aq keleli keńeste 2023–2024 oqý jylynyń qorytyndysy boıynsha Abaı oblysyndaǵy úzdik bilim berý uıymdary men pedagogteri marapattaldy. Aıtalyq, Aıagóz aýdanynyń qalalyq qazaq mektep-lıseıine – 28 mln teńge, Semeı qalasyndaǵy №16 Tóleýbaı Amanov atyndaǵy JOBBM – 10 mln teńge, Jarma aýdany Georgıevka orta mektebi – 10 mln teńge, Besqaraǵaı aýdanyndaǵy Kanonerka orta mektebi – 10 mln teńge jáne Aqsýat aýdanyndaǵy Q.Sátbaev atyndaǵy Jántikeı orta mektebine 10 mln teńge kóleminde qarjylaı syıaqy tabys etildi. Sonymen qatar bilim salasyndaǵy joǵary jetistikteri úshin Oqý-aǵartý mınıstrliginiń Alǵyshatyna 22 muǵalim ıe boldy. Oqý-aǵartý mınıstrliginiń qosymsha bilim berý isiniń úzdigi dıplomyn Jarma aýdany О́ner mektebiniń joǵarǵy biliktilik sanattaǵy horeografııa muǵalimi Danara Rahımbaeva ıelense, «Bilim berý isiniń qurmetti qyzmetkeri» tósbelgisi Aqsýat aýdanyndaǵy S.Seıfýllın atyndaǵy orta mekteptiń tarıh páni muǵalimi Erns Adılhanovqa berildi. Buǵan qosa Oqý-aǵartý mınıstrliginiń Qurmet gramotasymen 8 pedagog, «Eńbek ardageri» medalimen 4 pedagog, «Y.Altynsarın» tósbelgisimen 3 pedagog marapattaldy.
Abaı oblysy