Sıfrlyq damý mınıstri Jaslan Mádıev Parıjde Pavel Dýrovtyń ustalýyna qatysty pikir bildirdi. Ol bul týraly Facebook-tegi paraqshasynda jazba jarııalady, dep habarlaıdy Egemen.kz.
- Men Pavel Dýrovqa jáne Telegram komandasyna sońǵy oqıǵalarǵa baılanysty qoldaýymdy bildirgim keledi. Senbi kúni Paveldiń fransýz bıligimen kontent moderasııasynyń joqtyǵy jáne quqyq qorǵaý organdarymen yntymaqtastyqtan bas tartqany úshin ustalǵany habarlandy, - dep jazdy mınıstr jelide.
Sondaı-aq ol Sıfrlyq damý, ınnovasııalar jáne aeroǵarysh ónerkásibi mınıstrligi atynan Telegram komandasymen ózara árekettesýdiń oń tájirıbesi qalyptasqanyn basa atap ótedi.
- Biz derbes derekterdiń taralýyn, esirtki trafıgimen kúres jáne messendjerdegi basqa da zańsyz áreketterdi toqtatý boıynsha máselelerdi birneshe ret sátti ári jedel sheshtik. Telegram komandasy árdaıym azamattardyń qaýipsizdigin qamtamasyz etý úshin yntymaqtastyqqa daıyn, qupııalylyq pen sóz bostandyǵyn qorǵaý qaǵıdattaryna adal bolyp keledi. Qazaqstanda Telegram – eń tanymal messendjer, ony 12 mıllıonnan astam adam paıdalanady, bul onyń qoǵamymyz úshin qanshalyqty mańyzdy ekenin kórsetedi, - deıdi Jaslan Mádıev.