Qoǵam ózgerdi me, adam ózgerdi me, keıingi kezde balasyna kómektespeıtin bezbúırekter qatary kóbeıdi. Máselen, Atyraý oblysynda jyl basynan beri 181 adam balalaryna alıment tóleýden jaltarǵandardyń esebine alynyp otyr.
Atyraý qalalyq polısııa basqarmasy kóshi-qon bóliminiń ınspektory, polısııa leıtenanty Rımma Sıdıhovanyń aıtýynsha, ýchaskelik polısııa ınspektorlary sot oryndaýshylarymen birge alıment tóleýden jaltarǵandardy, boryshkerler men týysqandarymen qarym-qatynasyn úzgenderdi udaıy izdestiredi. Kámeletke tolmaǵan balalaryna alıment tóleýden jaltarǵandar memlekettik organdar men sot oryndaýshylarynyń esebine alynady.
«Jyl basynan beri alıment tóleýden jaltarǵany úshin 181 adam memlekettik organdardyń, sot oryndaýshylarynyń esebine alyndy. Al kóshi-qon bólimi arqyly alıment tóleýden jaltaryp júrgen 26, boryshker sanatyndaǵy 25 jáne týysqandarymen qarym-qatynasyn úzgen 7 adam izdestirý esebinde tur», deıdi Rımma Sıdıhova.
Onyń deregine súıensek, boryshkerlerdi izdestirýge baılanysty reıdtiń alǵashqy kúninde 10 adam anyqtalǵan. Olardyń arasynda alıment tólemegen – 8, ózge qaryzyn ótemegen 2 boryshker bar. Reıdtik is-shara kezinde kámelet jasyna tolmaǵan balalaryn baǵyp-qaǵý mindetin oryndamaı, alıment tóleýden jaltarǵan er adam ustaldy. Bezbúırek ákeniń qaryzy shamamen 2 mln teńgege jýyq somany quraıdy. Taǵy bir atyraýlyq turǵynnyń 2017 jyldan beri balasyna alıment tóleý mindetin oryndamaı kelgeni anyqtaldy. Ol alımentke bereshegin óteýden bas tartyp, bala aldyndaǵy jaýapkershilikten jaltaryp kelgen.
Al Qyzylqoǵa aýdandyq sotynyń aqparatyna súıensek, balalaryna tıisti alımentti tólemeı júrgen eki boryshkerdiń isi qaraldy. Ekeýi de Ákimshilik quqyq buzýshylyq týraly kodeksiniń 669-babynyń 1-bóliginiń talabyn buzǵan.
«Boryshkerlerdiń kámeletke tolmaǵan balalaryn asyrap-baǵýǵa aılyq tabysynyń jáne ózge de kirisiniń tıisti mólsherinen alıment óndirý týraly sot buıryǵyn oryndamaǵany anyqtaldy. Quqyq buzýshylar óz kinásin moıyndap, jumysqa ornalasýǵa jáne balalaryn asyrap-baǵý úshin alıment tóleýge ýáde berdi. Sot qaýlylarymen quqyq buzýshylar Ákimshilik quqyq buzýshylyq týraly kodeksiniń 669-babynyń 1-bóligimen kináli dep tanyldy. Balalaryna alıment tóleýden qashyp, quqyq buzǵan boryshkerdiń árqaısysyna 3 táýlik merzimge ákimshilik qamaqqa alyndy», dep habarlady aýdandyq sottan.
Atyraý oblysy