Táýelsizdik jastary – rýhy azat, oıy erkin. Olardyń arasynda tereń tarıh pen búgindi ushtastyryp, ulan-ǵaıyr jerdiń qasıetin seziner sóz sardarlarynyń orny bólek. Osy oraıda Mádenıet jáne aqparat mınıstrligi janynan qurylǵan «Alqa» jastar ádebı klýbynyń kóshpeli otyrysy Jetisý oblysynda ótti.
Is-sharaǵa mınıstrlik ókilderi, elimizdiń ár aımaǵynyń jas aqyn-jazýshylary, respýblıkalyq ádebı baıqaýlardyń jeńimpazdary, óńir qalamgerleri men kitaphana qyzmetkerleri qatysty. Otyrysta ádebıet salasyna qatysty, onyń ishinde qoǵamdyq mańyzy bar ádebıetterdi basyp shyǵarý, jas qalamgerlerdi qoldaý, ádebı baıqaýlar uıymdastyrý máseleleri talqylandy. Sondaı-aq qalamgerler ádebıetti damytýda ózderin tolǵandyrǵan oılary men usynystaryn ortaǵa salyp, josparlarymen bólisti. Otyrys barysynda jastar arasyndaǵy ádebı baılanysty arttyrý, óńirdegi qalamgerlerdi qoldaý, kitap naryǵyn, aýdarma salasyn damytý máseleleri de nazardan tys qalmady.
Mádenıet jáne aqparat mınıstrligi, Almaty, Jetisý oblysy ákimdikteriniń uıymdastyrýymen ultymyzdyń dúldúl aqyny Ilııas Jansúgirovtiń 130 jyldyǵyna, klassık jazýshy Berdibek Soqpaqbaevtyń 100 jyldyǵyna oraı jas aqyn-jazýshy-
larǵa arnalǵan ádebı týr bastalǵan bolatyn. Almaty oblysynan bastaý alǵan ádebı týr Jetisý oblysynda jalǵasyp, qatysýshylar kórnekti qalamger Saıyn Muratbekovtiń týǵan jerine baryp, jazýshynyń «Jabaıy alma» povesine arqaý bolǵan alma baǵy men ózi turǵan úıin kórdi. Sondaı-aq ádebı klýb músheleri I.Jansúgirov atyndaǵy ádebı mýzeıge, M.Tynyshpaev atyndaǵy oblystyq tarıhı-ólketaný mýzeıine, Aqyn Saranyń memorıaldy mýzeıine jáne Tamshybulaq mekenine bardy.