2025 jyly áleýmettik salaǵa 9,8 trln teńge baǵyttalady. Bul týraly Qarjy mınıstri Mádı Takıev Úkimet otyrysynda aıtty, dep habarlaıdy Egemen.kz.
«Bıýdjet shyǵystary 2025 jylǵa arnalǵan kirister men tapshylyqty eskere otyryp, 2024 jylǵa qaraǵanda 1,7 trln teńgege ulǵaıyp, 25,8 trln teńgeni quraıdy. Bıýdjet áleýmettik baǵytqa baǵdarlanǵan bolyp qala beredi. 2025 jyly áleýmettik salaǵa 2024 jylmen salystyrǵanda 794 mlrd teńgege ulǵaıyp 9,8 trln teńge baǵyttalady», dedi mınıstr.
Sonymen qatar 2024 jylmen salystyrǵanda granttar sany 2 500 orynǵa ulǵaıtylady.
«2025 jyly shamamen 78 myń bilim berý granty bólinedi. Joǵarǵy oqý oryndarynyń stýdentterine stıpendııa mólsherin orta eseppen 15-20%-ǵa ulǵaıtý josparlanyp otyr», dedi Qarjy mınıstri.
Nátıjesinde stıpendııanyń ortasha mólsheri bakalavrıat stýdentteri úshin 52 372 teńgeni, magıstratýra úshin 117 098 teńgeni quraıdy.