Bıyl jaz boıy Ahmet Baıtursynuly atyndaǵy Qostanaı óńirlik ýnıversıtetindegi «LabNetWork» zerthana kesheniniń qyzmetkerleri «Apache 3» atty gıdrografııalyq drondy belsendi paıdalandy. Bul apparat Ǵylym jáne joǵary bilim mınıstrliginiń «Soltústik Qazaqstannyń sý resýrstaryna jedel monıtorıng júrgizý jáne gıdrotehnıkalyq ınjenerlik qurylymdardyń ekologııalyq baqylaýy júıesin qurý» jobasy aıasynda alynǵan.
«Apache 3» gıdrografııalyq beıushaǵy – jerústi basqarý stansasymen jáne kememen jabdyqtalǵan shaǵyn avtomatty keshen. Qurylǵy sýaıdyndarynyń tereńdigin zertteý úshin bir jıilikti eholot jáne sý parametrleriniń datchıkterimen jabdyqtalǵan. Basqarý stansasy qurylǵy men radıokanal nemese uıaly baılanys arqyly baılanysyp, gıdrografııalyq túsirilimdi kez kelgen qashyqtyqta júrgizýge múmkindik beredi.
Gıdrografııalyq beıushaq Qostanaı oblysynyń sýqoımalary túbiniń relefin jáne sý kólemin baǵalaý úshin buǵan deıingi ekspedısııada qoldanyldy. Barlyq jumys respýblıkalyq joba aıasynda júrgizilip otyr. Qazirgi tańda ýnıversıtet ǵalymdary joǵary Tobyl jáne Karatomar sýqoımalarynyń túbine batımetrııalyq zertteý júrgizip, odan sý, topyraq jáne ósimdik materıaldaryn jınap, zerthanaǵa tapsyrdy. Ony atalǵan oqý ornynyń qyzmetkerleri – Almabek Nuǵmanov, Vadım Chashkov, Ádil Nurpeıisov, Temirlan Muqanov jáne ýnıversıtet magıstranty Artıom Bashev atqardy. Aıta keteıik, bıyl kóktemdegi tasqynnan keıin sýaıdyndarynyń túbi edáýir ózgergen, sondyqtan sý dronynyń ony zertteýdegi paıdasy mol. Apparat sýasty men ústindegi keńistiktiń avtomatty úshólshemdi túsirilimin júrgizýge, sondaı-aq ınjenerlik-geodezııalyq, ınjenerlik-gıdrografııalyq jáne ınjenerlik-gıdrometeorologııalyq zertteýler júrgizýge óte tıimdi. Ony sý túbiniń relefin zerttep, qubyr ótkelderin tekserip, kópirler men dambalardyń tireýish qurylymynyń jaǵdaıyn baǵalaýda qoldanady.