Reseı Parlamenti Federasııa Keńesiniń múshesi, TMD Baıqaýshylar mıssııasy atynan Qazaqstandaǵy kezekten tys prezıdenttik saılaýǵa baıqaýshy bolyp qatysqan Igor Zýga Qazaqstandaǵy saılaýǵa daıyndyq deńgeıi joǵary ekendigin atap kórsetti. Onyń aıtýynsha, ushaqtan túskennen bastap, qonaq úıge jetkenge deıingi aralyqta daıyndyq barysy barlyq qyrynan kórinip turypty. «Qazaqstanda bolǵan ýaqytymda saılaýǵa daıyndyq boıynsha eshqandaı kemshilik baıqamadym. Barlyǵy naqty ýaqytymen uıymdastyrylǵan túrde atqaryldy. Osy oraıda, uıymdastyrýshylyq deńgeıi óte joǵary dep aıta alamyn», – dedi Igor Mıhaılovıch.
TMD Baıqaýshylar mıssııasy óziniń jumysyn tańǵy 5.30-da bastaǵandyǵymen bólisken I.Zýga baıqaýshylar ýchaskelerdi óz erkimen tańdaǵanyn jáne olarǵa eshkim de shekteý qoımaǵanyn jetkizdi. Sondaı-aq, reseılik baıqaýshy elimizdegi prezıdenttik saılaýǵa Reseıdiń barlyq óńirleri úlken qyzyǵýshylyq tanytyp otyrǵanyn da jasyrmady. «Qazaqstandaǵy saılaý – nómiri birinshi jańalyq. Men ózim Omby oblysynanmyn, onda ornalasqan konsýldikte daýys berý úshin saılaý ýchaskesi ashylǵan. Meniń oıymsha, Omby oblysyndaǵy Qazaqstan azamattary da mundaıda úlken belsendilik tanytady», dedi Reseı Parlamenti Federasııa Keńesiniń múshesi.