Bul týraly Memleket basshysy Qasym-Jomart Toqaev búgingi Joldaýynda aıtty, dep habarlaıdy Egemen.kz
Prezıdenttiń aıtýynsha, ekonomıkany bilikti mamandarmen qamtamasyz etý – asa ózekti mindet. Eń aldymen, sý, energetıka, qurylys jáne basqa da salalarda qatty baıqalyp otyrǵan kadr tapshylyǵyn joıý qajet. Sondaı-aq bolashaqta suranysqa ıe bolatyn kásipter úshin bilikti mamandar daıarlaý kerek. Bul baǵytta naqty jumystar bastalǵan.
«Úkimet joǵary bilim salasyn halyqaralyq bilim berý keńistigimen yqpaldastyryp jatyr. Qazirdiń ózinde elimizde sheteldiń belgili 23 joǵary oqý orny jumys júrgize bastady. Olarǵa meılinshe qoldaý kórsetý kerek. Atap aıtqanda, maman daıarlaýǵa beriletin memlekettik tapsyrysty birtindep kóbeıtken jón. Bul tásildi bilim baǵdarlamasy zaman talabyna saı keletin óz oqý oryndarymyzǵa da qoldanýǵa bolady. Osy rette grant quny jastardy sapaly oqytýǵa múmkindik berýge tıis. Memleket qarjysyn ýnıversıtettiń bárine shashyratyp, ońdy-soldy tarata berýge bolmaıdy. Úzdik ýnıversıtetterdiń naqty sektormen baılanysyn nyǵaıtý kerek», dedi Memleket basshysy.
Sonymen qatar, Memleket basshysy Úkimet kolledjde jaqsy oqyǵan túlekterdi mamandyǵy boıynsha memlekettik qyzmetke alý múmkindigin qarastyrýy kerek ekenin atap ótti.
«Innovasııalyq saıasatty elimizdiń ǵylymı-tehnologııalyq basymdyqtarymen úılestirý qajet. Mundaı qadam ár saladaǵy ınnovasııaǵa serpin beredi. Sondaı-aq joǵary oqý oryndaryndaǵy qoldanbaly ǵylymnyń áleýetin arttyrady. Sonymen qatar ǵalymdardyń sheteldegi taǵylymdamasyn ánsheıin sınekýraǵa jáne «akademııalyq týrızmge» aınaldyrmaý kerek. Joǵary oqý oryndary ǵana emes, tehnıkalyq jáne kásiptik bilim berý mekemeleri de bilikti kadrlar daıarlaýy qajet. Úkimet kolledjde jaqsy oqyǵan túlekterdi mamandyǵy boıynsha memlekettik qyzmetke alý múmkindigin qarastyrýǵa tıis», dedi Qasym-Jomart Toqaev.