Qasym-Jomart Toqaev Emomalı Rahmondy Tájikstannyń Táýelsizdik kúnimen quttyqtady, dep habarlaıdy Egemen.kz Aqordanyń baspasóz qyzmetine silteme jasap.
Memleket basshysy quttyqtaý jedelhatynda Prezıdent Emomalı Rahmonnyń parasatty kóshbasshylyǵymen Tájikstannyń mańyzdy saıası jáne áleýmettik-ekonomıkalyq reformalardy júıeli túrde júzege asyryp, memlekettilikti nyǵaıtý jolynda senimdi qadam basyp kele jatqanyn, halyqaralyq arenada abyroıy joǵary ekenin atap ótti.
Qasym-Jomart Toqaev Táýelsizdik jyldarynda Qazaqstan men Tájikstan strategııalyq seriktestik jáne odaqtastyq rýhyndaǵy ózara tıimdi qarym-qatynas ornatqanyn, bul eki halyqtyń múddesine saı keletinin jetkizdi.
Memleket basshysy Tájikstan Prezıdentiniń jaýapty memlekettik qyzmetine tabys, al baýyrlas tájik halqyna baq-bereke tiledi.