Jańa oqý jyly Astana qalasynda «Qazbilim» ulttyq lıseıiniń esigi oqýshylarǵa aıqara ashyldy. Saltanatty keshke qoǵam qaıratkerleri, sondaı-aq bilim salasynyń ókilderi qatysty.
Lıseı 3–11-synyp aralyǵyndaǵy 700 balaǵa arnalǵan. Synyptarda oqýshy sany 16–18 oqýshydan aspaıdy. Munda shahmat, toǵyzqumalaq syndy ıntellektýaldy oıyndarǵa basymdyq berilip ári ulttyq aspaptar úıirmeleri jumys isteıdi. Pándik olımpıadaǵa baǵdarly daıyndyq jáne ulttyq biryńǵaı testileýge, «IELTS» emtıhanyna keshendi daıyndyq júrgiziledi. Eń bastysy, atalǵan mektep qazaq tilinde tereńdete bilim beredi, sondaı-aq balanyń boıyna ulttyq tárbıeni sińiredi.
«Biz ulttyq mekteptiń keregesin keńeıtip, sapasyn arttyrǵymyz keledi. Sebebi Maǵjan Jumabaev: «Mektebimizdi taza, berik hám qazaq janyna úılesetin negizde qura bilsek, keleshegimiz úshin taıynbaı serttesýge bolady», degen edi. Basty armanymyz – qazaqtyń janyna jaqyn mektepti qurý. Mustafa Shoqaı «Bala qaı tilde bilim alsa, túbi sol ultqa qyzmet etedi», dese, al Júsipbek Aımaýytuly jat jurttyń tárbıesin alǵan bala ultqa qyzmet qylyp jarytpaıtynyn aıtqan. Biz ultqa qyzmet qylatyn, qazaq armanyn oryndaıtyn mekteptiń negizin qalaǵymyz keledi. Eki jyl buryn «Qazbilim» ulttyq lıseıleriniń irgetasyn qalap bastaǵanbyz. Al qazir elimizdiń segiz qalasynda toǵyz mektep jumys istep jatyr», dedi «Qazbilim» jobalarynyń negizin qalaýshy Aıatjan Ahmetjanuly.
Aıta keteıik, qazaq tilinde tereńdete sabaq beretin ulttyq lıseıler buǵan deıin Atyraý, Aqtaý, Qostanaı, Qaraǵandy, Almaty, Shymkent, Qyzylorda qalalarynda ashylǵan edi. Al negizgi ádistemelik ortalyq, basqasha aıtsaq, ulttyq mektepter jelisiniń ózegi Astanadaǵy osy mektepte bolmaq.