Ulttyq ulan Bas qolbasshysynyń tárbıe jáne áleýmettik-quqyqtyq jumys jónindegi orynbasary Qaırat Úmbetov 3 jyl 9 aıda Ulttyq ulan sapynda júrgen 11 sarbazdyń qaıtys bolǵanyn málimdedi, dep jazady Egemen.kz.
Sondaı-aq osy ýaqyt aralyǵynda Ulttyq ulan qatarynda 58 áskerı qyzmetshi kóz jumǵan.
Qaıǵyly oqıǵalardyń qaıda, qalaı bolǵanyn Qaırat Úmbetov búgin «AMANAT» partııasy janyndaǵy Jastardy qoldaý jónindegi respýblıkalyq keńestiń kezekti otyrysynda baıandady.
Spıkerdiń aıtýynsha, 2022 jylǵy qańtar oqıǵasy kezinde Ulttyq ulannyń 2 sarbazy baqılyq bolǵan.
«Ulttyq ulan qatarynda sońǵy úsh jyl men 2024 jyldyń 9 aıynda 58 áskerı qyzmetshi kóz jumǵan bolsa, onyń ishinde sarbazdar sany - 11. Qalǵandary – ofıserler men kelisimshart boıynsha jumys isteıtin áskerı adamdar. Taǵy eki áskerı qyzmetker jol apatynan qaza tapty. Iаǵnı ózderi demalyp júrgende nemese jumystan tys ýaqytta kóz jumdy», dedi Qaırat Úmbetov.
Al Ulttyq ulannyń Almaty qalasynda ornalasqan 5574 áskerı bóliminiń sarbazy Almaz Shahımovtiń ústine shatyr qulap, qaıtys bolǵany habarlanǵan edi. Alaıda týystary sarbazdyń denesine júrgizgen zertteýde pyshaq jaraqaty men temeki izi tabylǵanyn málimdegen.
«Ulttyq ulan qataryndaǵy 29 áskerı qyzmetshi aýrýdan qaza tapty. Olardyń ishinde sarbaz bolyp qaza tapqany - 4 adam. Iаǵnı áskerge kelgen tórt adam densaýlyǵy jarymsyz bolyp, aýrýdan qaza tapqan. Taǵy bir áskerı qyzmetshini toq uryp qaza tapty. Bıyl bir áskerı qyzmetshi demalys kezinde qaıtys boldy. Osylaısha, osy 58 faktiniń ishinde 2021 jyly 5 sarbaz, 2022 jyly – 4 sarbaz, 2023 jyly - bir sarbaz qaza tapsa, 2024 jyldyń toǵyz aıy ishinde mundaı qaıǵyly oqıǵa bolǵan joq. Bul meniń resmı málimdemem», dedi Ulttyq ulan Bas qolbasshysynyń tárbıe jáne áleýmettik-quqyqtyq jumys jónindegi orynbasary.