Ǵalam ǵajaptary: Daýysqa qarap, dıagnoz qoıady

Olar joǵary qan qysymyn dıagnos­tıkalaýǵa júzdegen vokaldy bıomarkerdi qoldanǵan. Tehnologııanyń tıimdiligin baıqaý maqsatynda zertteýshiler 245 em­delýshige tájirıbe jasaǵan. Ma­man­dar eki apta boıy qatysýshylardyń daýy­syn 6 márte jazyp, baqylaýda ustaǵan. Nátıjesinde, neırojeli áıelderdiń 84%-y men erlerdiń 77%-ynda joǵary qan qysymyn dál anyqtaýǵa qabiletti bolyp shyqty. Joba avtorlarynyń aıtýynsha, ınnovasııa gıpertonııadan bólek, qant dıabeti aýrýlaryn da dıagnostıkalaı alady.

Jahandyq jármeńke

Qytaıdyń Fýszıan provınsııasynda 24-halyqaralyq ınvestısııa jáne saýda kórmesi ótip jatyr. 120 myń sharshy metrdi alyp jatqan tehnologııalyq alańdy tamashalaýǵa álemniń 119 elinen isker azamattar men saıahatshylar kelgen.

Sıamyndaǵy bul jármeńke jasandy ıntellekt, gýmanoıdty robot, bulttyq esepteý jáne ınternettik qurylǵylar sala­syndaǵy sońǵy tehnologııalyq jetis­tikterge arnalǵan. Onda 80-nen astam ınnovasııa qoıylǵan. Ásirese adam tárizdi qultemirler kelýshilerdi túrli qımylymen tańǵal­dyrdy. Máse­len, sekýndyna 3,3 metr jyl­damdyqpen qozǵalatyn robot densaýlyqqa qaýipti oryndarda adamnyń ornyna qyzmet etedi. Al jasandy ıntellektige negizdelgen robottar shynaıy sóıleı alady. Tipti egde kisilerdiń janyna serik bolyp, syrlasatyn qabiletke ıe.

Quraq kórpe rekordy

Astanada ótip jatqan dúnıejúz­ilik kóshpeliler oıyndary qarsa­ńynda elimizdiń qolónershileri 450 quraq kórpe tigip, Gınness rekordyn jańartty.

Uıymdastyrýshylardyń biri Nurgúl Abaıhannyń aıtýynsha, 19 oblystan 450 quraqshy kelgen. Olardyń arasynda 8 jastan 85 jasqa deıingi sheberler bar. «Byltyr 200 quraqshy Gınness kitabyna endik. Bıyl óz rekordymyzdy jańartyp jatyrmyz. Daıyndyqty 2024 jyldyń qańtarynda bastadyq. V Dúnıejúzilik kóshpeliler oıyndary ótetinin estip, óz úlesimizdi qosqymyz keldi. Basty maq­satymyz – qazaqtyń aýyzbirligin kórsetý. 450 kórpesheniń bári birdeı, egiz kórpedeı. Bir tehnıka, bir ólshemmen tigilgen. Jaıylǵan kezde úlken kilem tárizdi bolady», deıdi ol.