Kóshpeliler oıyndary aıasynda «Qusbegilik» sport túri boıynsha eki kún qatarynan ótken jarys máresine jetti. Tartysty dodada otandastarymyz 2 altyn, 1 kúmis, 3 qola medal enshiledi, dep jazady Egemen.kz.
«Búrkit salý» saıysynda birinshi oryndy ulttyq qurama múshesi Serikbek Kúntýǵan «Alǵyr» qusymen ıelendi. 2 jattyǵý boıynsha ótken tartysty básekede ekinshi oryndy «Zańǵar» atty qusymen Erzat Baıqadamov jeńdi. Al qola medaldi qusbegi Arman Qoshqarov «Naryn» atty búrkitimen túıindedi.
«Qarshyǵa salý» sanaty boıynsha «altyndy» «Naızatuıaq» qusymen astanalyq Qudaıbergen Raýıluly jeńip alsa, Qyrǵyzstan sportshysy – Adılbek Qudaıberdıev «Qaramonshaq» qusymen kúmispen kúpteldi. Osy synda taǵy bir otandasymyz Baǵdat Keýenov «Sombalaq» qarshyǵasymen qola medalǵa qol jetkizdi.
«Itelgi salý» synynda júldeli eki oryndy qyrǵyz sportshylary Bakyt Shamýratýly jáne Túgelbaı Abdykadyrov ózara bólisse, qola medal – ulttyq qurama múshesi Baqdáýlet Babajanǵa buıyrdy.
Q4 Tulpar Auto kompanııasynyń qoldaýymen Qusbegilik federasııasy «búrkit salý» sanatynda jeńimpaz atanǵan Serikbek Kúntýǵanǵa jańa avtokólik tabystady.
Budan bólek, V Dúnıejúzilik kóshpeliler oıyndary dıreksııasynyń atynan jeke sport túrlerinde jeńimpaz atanǵandarǵa birinshi oryn úshin - 500 myń teńge, ekinshi oryn ıelengenderge - 300 myń teńge, qola júldegerge - 200 myń teńgege arnaıy sertıfıkat berildi.