Jaqynda elordadaǵy Baıqońyr aýdanynyń Á.Jangeldın kóshesinde qoǵamdyq tártip pen qaýipsizdikti qamtamasyz etý qyzmetin atqarý kezinde patrýldik top bastyǵy Ermahan Tórebekov qansyrap jatqan adamǵa alǵashqy kómek kórsetken.
Jábirlenýshige dereý alǵashqy kómek kórsetip, jedel járdem men polısııa qyzmetkerlerin oqıǵa ornyna shaqyrǵan. Sondaı-aq beınebaqylaý kameralarynyń kómegimen oqıǵa ornynan qashyp ketken kúdiktiniń baǵytyn anyqtaǵan. Shuǵyl habarlama alǵan áskerı jasaq bastyǵy, serjant Nursultan Qaıratbek, patrýldeýshi sarbazdar Baqytjan Boranbaev pen Iаroslav Fıks jedel izdestirý sharalaryn uıymdastyryp, kóp uzamaı kúdiktini Qarasaı batyr kóshesinde qolǵa túsiredi.
Keshe Ulttyq ulannyń elordadaǵy áskerı qalashyǵynda qyzmetin qaltqysyz atqarǵan áskerı qyzmetshiler Ishki ister mınıstriniń orynbasary, Ulttyq ulannyń bas qolbasshysynyń buıryǵymen «Ulttyq ulan qyzmetiniń úzdigi» tósbelgisimen marapattaldy. Marapatty jaýyngerlerge Ulttyq ulan bas shtab bastyǵynyń orynbasary – Jedel basqarý bas basqarmasynyń bastyǵy Erlan Jaqypov tabystady.
– Qala tynyshtyǵyn saqtaý – bizdiń basty mindetimiz. Bas qalada ótip jatqan aýqymdy is-shara kezinde turǵyndar men qonaqtardyń qaýipsizdigin qorǵaýǵa erekshe mán berilgen. Sondyqtan kez kelgen jaǵdaıǵa daıynbyz, – deıdi sarbazdar.
Búginde qala kóshelerinde tikeden tik turyp, táýlik boıy tynyshtyqty saqtaýǵa atsalysyp júrgen áskerı jasaqtardyń arqasynda joǵalǵan jandar jaqyndaryna tabystalyp, tabylǵan zattar ıelerine qaıtaryldy. Túrli qylmystyń aldyn aldy. Sarbazdardyń qyraǵylyǵy kún saıyn túrli qylmystyq oqıǵaǵa tosqaýyl qoıyp, esirtkimen, qarýmen júrgen qoǵamǵa qaýipti azamattar qolǵa túsip, zań aldynda jaýapqa tartýǵa septigin tıgizip jatyr. Adam ómirine arasha túsken jaǵdaılar da az emes. Búginde bas qalanyń tynyshtyǵyn saqtap, turǵyndardyń qaýipsizdigin qorǵaýǵa Ulttyq ulannan kún saıyn myńnan asa áskerı qyzmetshi jumyldyrylady.