Ulytaý oblysynda úsh jetim balaǵa mal baqtyryp, uryp-soqqan áıel 4 jylǵa sottaldy, dep habarlaıdy Egemen.kz Ulytaý oblysynyń prokýratýrasyna silteme jasap.
Sottalýshy Sadyqova 2018 jyly balalar úıinen 3 jetim balany asyrap alady. Olardy sharýa qojalyǵyna ákelip, mal baqtyrady. Balalardyń jumysy kóńilinen shyqpaǵan kezde olardy uryp jazalaǵan.
«Sadyqova patronattyq kelisimniń mindetterin bile tura zań talabyn oryndamaı, balalardy aýyr úı jumysymen aınalysýǵa, sonymen qatar Jezqazǵan aýmaǵynda metall synyqtaryn jınaýǵa májbúrlegen», delingen prokýratýranyń habarlamasynda.
Sot úkimimen kámeletke tolmaǵandardy azaptaǵany jáne qorǵanshy ókilettigin asyra paıdalanǵany úshin kináli dep tanylǵan áıel 4 jylǵa sottaldy.