PETROPAVL. 15 maýsym. Dúnıejúzilik donor kúni oblysta qan tapsyrýshylar qatary kóp boldy. Bul týraly egemen tilshisi habarlady.
Qan quıý ortalyǵyna alǵashqylardyń qatarynda Gúlnara Zaıtdınova jetti. Ol adam ómiriniń arashasy retinde shırek ǵasyrǵa jýyq belsene atsalysyp keledi.
«20 jasymda alǵash ret qan tapsyryp edim. Sodan beri osy dástúrden qol úzgen joqpyn. Osynda jylyna 3-4 ret kelemin. «Qurmetti donor» sanalamyn», deıdi ol.
Bul kúni ózderiniń azamattyq paryzdaryna úlken jaýapkershilikpen qaraǵan 5 adamǵa arnaıy syılyqtar úlestirildi. Solardyń biri qalalyq máslıhattyń hatshysy Lázzat Jamuqanova depýtattar, memlekettik qyzmetshiler, áskerıler de aksııany belsendi qoldaýshylar bolyp tabylatynyn jetkizdi. О́zge qan tapsyrýshylarǵa da syı-kádeler jasaldy.
Oblystyq qan quıý ortalyǵy bas dárigeriniń orynbasary Natalıa Solodýhınanyń aıtýynsha, byltyr 7,5 myń lıtr qan jınalsa, bıyl 10600 lıtrge jetkizý belgilengen.
Alǵashqy kúni 200 petropavldyq erikti túrde qan tapsyrdy. Aksııa jalǵasýda.
О́mir Esqalı.
Derek, sýret: egemen.kz