1960 jyl. «Kalýga» tehnıkýmyndaǵy muǵalim Borıs Grıshınniń robot jasaıtyn oıy da bolmaǵan edi. Ol stýdentterge sýret salýdy úıretetin. Tipti osy birqalypty ómirin eshteńege aıyrbastaǵysy kelmeıtin. Biraq bir kúni onyń ómiri túbegeıli ózgerdi.
Tosynnan kelgen ózgeris Borıstiń anasy aty jaman aýrýǵa shaldyqqannan keıin bastaldy. Onyń anasyna degen mahabbaty erekshe-tuǵyn. Naýqas adamǵa kútim jasaı almaıtynyn túsingende, júregi ezildi. Sebebi jumysyn tastasa, kúnkórisi muńǵa aınalady. Osy sátte ol elektrmehanıkalyq kómekshi jasaımyn degen sheshimge keledi. Bir qyzyǵy, sol zamanda teledıdardyń ózi naǵyz ǵajaıyp bolyp kórinetin. Keńes odaǵy ǵaryshty endi ıgergen kezeńde, Borıstiń mundaı maqsat qoıýy – naǵyz batyldyq.
1962 jyl. Úlken izdenisten keıin robothatshynyń syzbalary daıyn boldy. Al 3 jyldan keıin robot quralyp, iske qosyldy. Borıs oǵan «Arsık» dep at qoıdy. Habarlama jazý, adamdarmen sóılesýge birden 2 magnıtofon, qımyldaýyna 13 elektr qozǵaltqysh qoldanyldy. Bastapqy kezde qurylǵynyń kemshin tusy óte kóp edi. Degenmen «chıp» uǵymy áli tolyq enbegen ýaqytta, Arsık – óner týyndysy-tuǵyn.
1966 jyl. Talapty jigit dittegen maqsatyna jetti. Qultemir Borıstiń anasyna qolǵanat boldy. Tańerteń oıatyp, dárisin beretin, qajetti jattyǵýyn jasatatyn. Teledıdar, radıo qosyp berip, qonaqtardy qarsy alatyn, qońyraýǵa jaýap beretin. Tipti muǵalim jigittiń kún tártibine de jaýapty boldy. Solaı jyldar jyljyp, Borıstiń anasy ómirden ótti. Ol ulynyń ónertabysyna dán rıza edi. О́zi úshin jasalǵan Arsıkti jaqsy kóretin. Syrqat dendep, kóz jumar sátinde uly Borıs, qolǵanaty Arsık janynda turdy.
2015 jyl. О́nertapqysh Borıs Grıshın 91 jasynda qaıtys boldy. Arsık bul kezde de ıesin aqtyq saparǵa shyǵaryp saldy. Marqumnyń týystary ony jergilikti murajaıǵa tapsyrdy. Osylaısha, robot 50 jyl boıy jan joldas bola bildi. Osy oqıǵany estigen jurt «Qultemir de mahabbattan týady eken-aý» desti...