Astanada balasyn arbaǵa salyp, serýendep júrgen áıeldiń áreketi polıseılerdiń kúdigin týǵyzǵan. Teksere kelgende arba ishinen esirtki kýrerleri men dropperlerdiń zańsyz jumysyn jarnamalaıtyn QR kodtary bar qaǵazdar tabyldy, dep habarlaıdy Egemen.kz.
Astanada polıseıler bala arbasyn súıregen 27 jastaǵy kelinshekti ustady. Syrttaı qaraǵanda balasyn taza aýaǵa alyp shyqqandaı kórinetin bul jaǵdaıdyń artynda zańsyz shema jasyrýly bolyp shyqty.
- Ol esirtki kýrerleri men dropperlerdiń zańsyz jumysyn jarnamalaıtyn QR kodtary bar jelimi bar qaǵazdy japsyrýmen aınalysqan. Iz kesýshiler syrtqy qaýipsizdik kameralary jazbalarynan kúdikti áreketterdi baıqady: áıel ǵımarattarǵa, podezderge, shlagbaýmdarǵa, tipti kondısıonerlerge de qaǵaz japsyryp júrgen. Jedel-izdestirý sharalarynan keıin qaskúnem ustaldy, - delingen polısııa habarlamasynda.
Polısııa boljamynsha, ol Telegram-daǵy arnalardyń birine tirkelip, kýratordan tapsyrma alyp otyrǵan, qala boıynsha 500-ge jýyq qaǵazdy japsyryp shyqqan. Ol úshin oǵan aqy tóleýge ýáde berilgen, qalaı degenmen de áıel adam "ıkemdi kesteniń" artynda qylmystyq áreketter turǵanyn jaqsy bilgen.
Qazir kúdiktige qatysty esirtkini nasıhattaý jáne onyń zańsyz jarnama faktisi boıynsha qylmystyq is qozǵaldy. Jedel tergeý sharalary júrgizilip jatyr, polısııa kúmán týǵyza qoımaıtyn japsyrma qaǵazdar artynda úlken qylmystar jasyrýly bolýy múmkin ekenin eskertedi.