«Qolyńnan kelse, qonyshynan bas», deıtin edi baıaǵynyń qarııalary. Osynyń kerin basqa emes, okrýg ákimderi keltiretini, árıne, ókinishti jaıt. Máselen, Mahambet aýdanyndaǵy Beıbarys, Baqsaı jáne Mahambet aýyldyq okrýgteri ákimdikteriniń qyzmetkerleri dálelsiz málimetter kórsetilgen qujattar negizinde zańsyz sýbsıdııa berýge jaǵdaı týǵyzǵan.
Al tıisti zańdylyqqa súıengen aýdandyq prokýratýra muny sybaılas jemqorlyqqa jaǵdaı týǵyzatyn is retinde qarastyryp otyr. Bul, árıne, aýdandyq prokýratýramen sýbsıdııalardy bólý jáne berýdiń zańdylyǵyna júrgizilgen tekserýde anyqtalypty. Zańsyz berilgen sýbsıdııanyń jalpy somasy 4 334 960 teńgeni quraıdy.
Osylaısha sybaılas jemqorlyqqa jaǵdaı týǵyzatyn quqyq buzýshylyqtar jasaǵany úshin Baqsaı, Beıbarys jáne Mahambet aýyldyq okrýgteri ákimi apparattarynyń 3 jaýapty qyzmetkeri tártiptik jaýapkershilikke tartyldy.
Joldasbek ShО́PEǴUL,
«Egemen Qazaqstan».
Atyraý oblysy.