QOSTANAI. 28 qańtar. L.Tolstoı atyndaǵy Qostanaı oblystyq ámbebap kitaphanasynda Ilııas Esenberlıniń týǵanyna 100 jyl tolýyna arnalǵan «Eliniń erteńi úshin eńbek etken Esenberlın» atty eske alý keshi ótti. Onda jınalǵan jurtshylyq Esenberlınniń Atbasardaǵy mýzeıinen ákelgen, jazýshynyń kózindeı kórinetin ol tutynǵan zattardy tamashalady. Bul týraly egemen.kz tilshisi habarlady.
Ilııas Esenberlınniń 100 jyldyǵyn 2015 jyly IýNESKO aıasynda atap ótý týraly sheshim qabyldanǵan bolatyn. Bul esim qazaq ádebıeti men mádenıeti alyptarynyń qatarynan oıyp oryn alady. Onyń shyǵarmalary elimizdiń ulttyq ıgilik bolyp tabylady.
I.Esenberlın jıyrmasynshy júzjyldyqta el basyna túsken qaraly kúnderdiń tarıhı shyndyǵyn keler urpaqqa jetkize bilgen qazaq halqynyń kemeńger perzentteriniń biri. Kitaphanadaǵy bul shara I.Esenberlınniń shyǵarmalaryn el ishinde keńinen nasıhattaý, jazýshynyń ómiri men shyǵarmashylyǵy jaıynda jurtshylyq bile tússin degen maqsatpen uıymdastyryldy. Kitaphana qyzmetkeri Elvıra Sapabekova: «Jazýshynyń shyǵarmalary jas urpaqty otansúıgishtikke, eldiń tarıhyn qurmetteı bilýge tárbıeleıdi. Onyń tarıhy romandary qazaq tarıhy jóninde óte mol maǵlumattar beredi. Ol osynysymen de qymbat», dedi.
Keshke I.Esenberlınniń Atbasar qalasyndaǵy ádebı-memorıaldyq mýzeıiniń ǵylymı qyzmetkeri Úmitjan Bekenova, mýzeıdiń qor saqtaýshysy Quralaı Jaqypova jazýshynyń tutynǵan zattaryn, qundy jádigerlerdi kórsetti. Keshke Qostanaı qalasyndaǵy joǵary oqý oryndarynyń, orta mektepterdiń oqytýshylary, stýdentter, jalpy jurtshylyq ókilderi, kitaphana oqyrmandary qatysty.
Kesh sońynda qonaqtarǵa «Kóshpendiler» kórkem fılmi kórsetildi.
Sharaǵa arnalyp uıymdastyrylǵan kitap kórmesine Ilııas Esenberlın murajaıynan ákelingen eksponattar qoıyldy. Kesh barysynda jınalǵandardyń nazaryna elektrondy kórsetilimder usynyldy.
Názıra Járimbetova.
Derek, sýret: egemen.kz.