«Pedagog-sheber» Sanat Musataı elimizde naqty pánderdi oqytýda kósh basynda turǵan, jarty ǵasyrdan astam tarıhy bar O.Jáýtikov atyndaǵy respýblıkalyq fızıka-matematıka mektebinde fızıka páninen sabaq beredi. Fızıka boıynsha olımpıadalyq rezerv komandasynyń jattyqtyrýshysy.
Sanat Saǵatuly ál-Farabı atyndaǵy Qazaq ulttyq ýnıversıtetiniń túlegi, Q.Sátbaev atyndaǵy Qazaq ulttyq tehnıkalyq ýnıversıtetinde fızıka magıstri dárejesin alǵan. «Qazaqstan Respýblıkasy bilim berý isiniń qurmetti qyzmetkeri», 5-shi jáne 6-shy halyqaralyq matematıka, fızıka jáne ınformatıka muǵalimderi konkýrsynyń jattyqtyrýshylar lıgasynyń altyn medal ıegeri. RFMM olımpıadalyq rezerv boıynsha 2020 jyl treneri jáne 2023 jyl muǵalimi. Bilikti ustazdyń marapttar qorjyny munymen taýsylmaq emes. Bul – óz isine shynaıy berilgen naǵyz maman eńbeginiń jemisi.
«Fızıka-matematıka mektebinde oqý – óte úlken jaýapkershilik. Munda oqýshylarǵa qoıylatyn talap ta joǵary. Degenmen oqýshylardyń barlyǵy derlik olımpıadaǵa qatysa bermeıdi. О́ıtkeni, biri ǵylymı jobalarmen aınalyssa, endi biri robototehnıkaǵa, baǵdarlamalaýǵa qyzyǵady. Sondyqtan mektep muǵalimderi ár balanyń qabiletine qaraı baǵyt-baǵdar berip otyrýǵa tyrysady, sonyń ishinde olımpıadaǵa qatysýdyń orny bólek», deıdi tájirıbeli ustaz.
Sanat Saǵatuly bala kezden fızıkaǵa qyzyǵyp óskenin aıtady. Al salany tańdaýyna ınjener-elektrık bolyp jumys istegen ákesi Saǵattyń yqpaly zor boldy. «Bilim jáne eńbek», «Iýnnyı tehnık», «Modelıst konstrýktor», «Radıo» jýrnaldaryn kóp oqıtyn áke isiniń balaǵa úlgi bolǵany anyq. Oıyn balasy kóbine tabıǵatty, ondaǵy qubylystardy túsinýge tyrysty. Al mektepte, joǵary oqý oryndarynda alǵan bilimi Sanat Saǵatulynyń fızıka ǵylymyn tereń tanýyna jol ashty. Bilikti ustazdary kórsetken bilim joly adastyrmady. Búginde ózi de osy jolda bilimdi urpaq tárbıeleý isine belsene atsalysyp keledi. «Fızıka kúndelikti ómirde nemese tabıǵatta kezdesetin qandaı da bir máseleni qozǵaıdy desek, ony tereńirek ári durys túsiný úshin oqýshylaryma taqyryptyq esepterdi kóbirek shyǵartýǵa, tájirıbede kórsetýge tyrysamyn», deıdi ol.
Sanat Saǵatulynyń oqýshylary jyl saıyn fızıka páninen respýblıkalyq, halyqaralyq olımpıadalardyń jeńimpaz, júldegeri atanyp júr. Olardyń qatarynda Halyqaralyq fızıka olımpıadasynda (IPhO) RFMM oqýshylary Nurıslam Tursynbek 2013 jyly kúmis medal ıelense, keler jyly altyn medal enshilegen, al Marǵulan Nursaǵatov 2024 jyly kúmis medal ıegeri atandy. Bıyl qańtar aıynda ótken Halyqaralyq Jáýtikov olımpıadasynda 16 elden qatysqan 670 oqýshynyń 194-i fızıka páni boıynsha saıysqa tússe, sonyń ishinde RFMM oqýshylary fızıka páni boıynsha 1 altyn, 1 kúmis, 6 qola medalǵa ıe boldy. Osy jylǵy respýblıkalyq oqýshylar olımpıadasynyń aqtyq kezeńine fızıkadan 10 oqýshy joldama alyp, onyń beseýi altyn, bireýi kúmis, tórteýi qola medal jáne bireýi maqtaý qaǵazyna qol jetkizdi. RFMM oqýshylary olımpıadada eń kóp medal alyp, mektep respýblıka boıynsha 1-oryndy enshiledi.
Sanat Saǵatulynyń aıtýynsha, olımpıadaǵa daıyndalatyndarǵa joǵarǵy kýrs fızıkasyn meńgerýge týra keledi. «Oqýshylarymyz fızıkamen birge, joǵary kýrs matematıkasynyń keıbir taraýlaryn da qosa oqıdy. Joǵary daıyndyqtan ótken olardyń pándik bilimi ǵylymı jobalarǵa qatysatyn oqýshylarmen, tipti ýnıversıtet stýdentterimen salystyrǵanda áldeqaıda ozyq dep maqtanýǵa bolady. Halyqaralyq olımpıadalarda joǵary kórsetkishke ıe bolyp júrgen oqýshylarymyz – mekteptiń de, ustazdardyń da mártebesi», deıdi Sanat Saǵatuly.
Sapaly bilim berýde zamanaýı tehnıka men tehnologııalardy qoldaný aıasyn keńeıtý, muǵalimderge óz pánin oqytýda erkindik, shyǵarmashylyq ádisterdi qoldanýǵa múmkindik berý de ýaqyt talabynan týyndap otyr. Ustazdardyń aılyq mólsherin kóbeıtý – daryndy, bilimdi jastardyń muǵalim mamandyǵyn tańdaýyna jáne oıy ozyq, zamanaýı tehnologııalardy meńgergen jas ustazdardyń kóbeıýine yqpal eteri anyq.
ALMATY