Abaı oblysynda orman órtimen kúreste qaza tapqan órt sóndirýshiler men ormanshylarǵa eskertkish qoıyldy.
«Jamandyq aıtyp kelmeıdi» degen. Sońǵy jyldary elimizdiń ár óńirinde bolǵan órt pen tasqyn sý apaty kezindegi túrli qıyndyq halqymyzdy synady. Birligimizdi arttyrdy. О́mir men ólim arpalysyndaǵy qasıetimizdi shyńdady.
«Semeı ormany» rezervatyna qarasty Borodýlıha aýdany Kamyshenka orman sharýashylyǵynyń janynda qyzmettik boryshyn oryndaý kezinde ǵumyry úzilgen ormanshylarǵa arnalǵan eskertkishtiń avtory – talantty músinshi, osyǵan deıin elimizge tanymal tulǵalardyń beınesin somdaǵan Nurbol Qalıev. Ormanshylardyń erligin áspettegen músinniń bıiktigi – granıt tuǵyrymen qosa eseptegende 8 metr. Buǵan qosa qoladan jasalǵan eskertkish qaza tapqandardyń batyldyǵy men óz isterine adaldyǵyn beıneleıtin releftermen bezendirilgen.
«Bir eskertkishpen biraz nárse aıtýǵa bolatynyn eskersek, osy jumys arqyly orman órti kezinde qaza tapqandardyń esimin el jadynda jańǵyrtyp, keleshek urpaqqa keń kólemde nasıhattaı alamyz. Bıylǵy jyly sáýir aıynda bastalǵan shyǵarmashylyq jumystyń nátıjesinde el úshin basyn báıgege tikken búginginiń batyrlaryn ulyqtaý paryz boldy», deıdi músinshi N.Qalıev.
Eskertkishtiń saltanatty ashylý rásiminde opat bolǵan ormanshylardy bir mınýt únsizdikpen eske aldy. Oblys ákimi Nurlan Uranhaev jerlesterimizdiń erligi tek osy óńirdiń ǵana emes, barsha otandasymyz maqtanatyn qubylys ekenin jetkizdi.
«Qara ormandy qadirlep, erlik pen órliktiń jarqyn úlgisin kórsetkender urpaq jadynda máńgi saqtalady. Bul tuǵyrtas tabıǵattyń tosyn minezine tótep bergen azamattardyń atyn áıgileý úshin arnaıy qoıylyp otyr. Esimderi tarıh taqtasyna altyn árippen jazylyp, urpaǵy maqtan eter jerlesterimizge, biz, qashanda basymyzdy ıemiz», dedi óńir basshysy.
Qaza bolǵan ormanshynyń týysy Araı Ámirhanova ashylǵan eskertkishtiń marqumdarǵa kórsetilgen zor qurmet ekenin atap ótti. Sonymen qatar sonaý qaıǵyly kúnderden bastap jan jarynan, ulynan, aǵa-baýyrynan aıyrylǵan jandardyń memleket tarapynan kórsetilgen qoldaýdy tereń sezingenin málim etti.
О́tken jyly maýsym aıynda bolǵan qaıǵyly oqıǵa mezetinde Memleket basshysy Qasym-Jomart Toqaev Abaı oblysyna arnaıy kelip, qyzmetin atqarý kezinde kóz jumǵandardyń esimi eleýsiz qalmaıtynyn aıtqan edi. Boı kóterip otyrǵan eńseli eskertkish te eldiktiń nyshany retinde beıbit zaman batyrlarynyń esimin jurt jadynda jańǵyrtty.
Abaı oblysy