Tulǵalarǵa tas atatyn adasqan jastardyń qatary kóbeıip barady. Májilistiń jalpy otyrysynda «Amanat» partııasy fraksııasynyń múshesi Janarbek Áshimjanov atalǵan máseleni kóterdi, dep habarlaıdy Egemen.kz.
«Uly Abaıdy – krıshnaıt, Mustafany qashqyn, Álıhandy jóıit, Shámshini «araqkesh» dep, batyrlarymyzdy – baıǵus, tulǵalarymyzdy – týlaq etip jatqan mysaldar az emes. Jýyrda jelide bir jelókpeniń ult ustazy – Ahmet Baıtursynuly babamyzdyń beınesin bas salyp toqpaqtap, judyryqtap jatqanyn kórip janymyzdan túńildik. Al kúni keshe nadandyq pen topastyqtyń qıylysqan núktesinen búr jarǵan jas bala qazaq poezııasynyń taý tulǵasy Muqaǵalı Maqataevtyń arýaǵyna til tıgizip, eldiń esin ekeý, túsin tórteý qyldy», dedi depýtat.
Májilis depýtaty Janarbek Áshimjanovtyń aıtýynsha, Úkimet ultymyzdyń uly tulǵalaryn qorlaýǵa jol bermeıtin sharalardy zańdyq turǵydan qolǵa alýy kerek.