Prezıdent janyndaǵy Ulttyq ǵylym akademııasy Turan ýnıversıteti bazasynda «Ǵylym qorymen» birlesip, ǵylymdy kommersııalandyrýdyń I Eýrazııalyq forýmyn ótkizdi.
Halyqaralyq forýmnyń ashylýynda sóz sóılegen Prezıdent janyndaǵy Ulttyq ǵylym akademııasynyń prezıdenti Aqylbek Kúrishbaev ǵylymnyń damýy men onyń ekonomıkaǵa yqpalyna erekshe nazar aýdarý qajettiligine toqtaldy.
«Búgingi tańda ǵylymdy kommersııalandyrý – kez kelgen eldiń turaqty ekonomıkalyq damýynyń basty faktory. Qazaqstan úshin bul baǵyt erekshe mańyzdy, sebebi bizdiń ǵylymı áleýetimizdi naqty ekonomıkalyq jetistikterge aınaldyrý – bolashaǵymyzdyń negizi. Ǵylymdy kommersııalandyrý – Qazaqstan men tutas Eýrazııa aımaǵynyń turaqty ekonomıkalyq damýynyń mańyzdy faktory. Qarjylandyrýdyń jetkiliksizdigi, ınfraqurylym men kadrlardyń tapshylyǵy, sondaı-aq quqyqtyq bazanyń jetilmeýi sııaqty máselelerdi ǵylymı ekojúıeni damytýǵa baǵyttalǵan keshendi sharalar arqyly sheshý múmkin. Tek júıeli tásilmen ǵana Qazaqstan ǵylymı jetistikterdi tıimdi túrde básekege qabiletti ónimder men qyzmetterge aınaldyryp, ekonomıkanyń turaqty ósimin qamtamasyz ete otyryp Eýrazııada kóshbasshy orynǵa shyǵýǵa múmkindik alady» dep atap ótti.
UǴA prezıdentiniń aıtýynsha, ǵylymı ázirlemelerdi ekonomıkaǵa engizý mehanızmderiniń, jobalar ǵylym men bıznes arasyndaǵy baılanystyń joqtyǵy, sondaı-aq startaptardy qoldaý júıesiniń bolmaýy saldarynan iske aspaı qalady. Ǵylymı ıdeıalardyń básekege qabiletti naryqtyq ónimderge aınalýy úshin startaptar men skeılap ortalyqtardy damytýǵa qolaıly jaǵdaı jasaý qajet.
Ǵylym jáne joǵary bilim vıse-mınıstri Darhan Ahmed-Zakıdiń pikirinshe, ǵylym salasy ekonomıka men qoǵamǵa naqty paıda ákeletin praktıkalyq baǵytqa aýysatynyn jáne ol otandyq kásiporyndardyń básekege qabilettiligin arttyryp, azamattarymyzdyń ómir súrý sapasyn jaqsarta otyryp, óndiriske engizilýi múmkin jáne engizilýi tıis jańa ıdeıalar, tehnologııalar men sheshimder ákeledi.
«Búgin bizdiń aldymyzda úlken mindetter tur. Biz ǵylym men tehnologııa kez kelgen memlekettiń tabysynyń negizgi faktoryna aınalatyn jyldam jahandyq ózgerister dáýirinde ómir súrip jatyrmyz. Qazaqstan ǵylymı-ınnovasııalyq damý salasynda jetekshi orynǵa ıe bolýǵa umtylady jáne bul ǵylym, ónerkásip jáne bıznes arasyndaǵy tyǵyz yntymaqtastyqsyz múmkin emes. Osyǵan baılanysty biz ǵylym mınıstrligi retinde Ǵylym men bıznes nátıjeli ózara árekettese alatyn tıimdi ekojúıeni qurýǵa aıtarlyqtaı kúsh salamyz» dedi vıse-mınıstr.
«Turan» ýnıversıtetiniń rektory Rahman Alshanov ǵylymdy damytý men ınnovasııalyq sheshimderdi óndiriske engizýdiń kóptegen múmkinshiligi bar ekenin atap ótse, elimizde júzege asyp jatqan jobalar barysyna toqtalǵan «Ǵylym qory» basqarma tóraǵasy Kamıl Aqatov, ınnovasııalyq jobalarǵa, olardyń el ekonomıkasyn kóterýdegi mańyzyna toqtaldy.
Forým barysynda «Skolkovo» qory bas dırektorynyń orynbasary A. Okýnev (Reseı), «Gund Investment» basqarma tóraǵasy D.Jargalsaıhan (Mońǵolııa), «Qazinnovations» basqarma tóraǵasy S.Joldyhan, basqa da ǵalymdar paneldik sessııalar barysynda óz tájirıbelerimen bólisse, Reseı, Qyrǵystan, Tájikstan, Ázirbaıjan, Monǵolııa jáne Qazaqstan ǵalymdary 50-den astam bıznes jobalaryn tanystyryp, iske asyrý tetikterin qarastyrdy.
Forým aıasynda Prezıdent janyndaǵy Ulttyq ǵylym akademııasy men «Skolkovo» Reseı qorynyń arasyndaǵy ǵylymdy kommersııalandyrý boıynsha eki jaqty kelisimge qol qoıýy ǵalymdarǵa ǵylymı jańalyǵyn halyqaralyq deńgeıde damytýǵa múmkindik beredi.
ALMATY