Erbol Bekmuratov – Zerendi aýdanyna qarasty Elenovka selosyna О́zbekstannan qonys aýdarǵan qandastardyń biri. Otbasyndaǵy alty balany asyraımyn dep istemegen kásibi joq. Qurylysshy da bolǵan, mal da baqqan, jolaýshy da tasymaldap kórgen. Jańalyqqa jany qumar jas jigit osydan eki jyl buryn aýyl turǵyndary úshin birshama tańsyq kásip – balmuzdaq shyǵarýdy qolǵa alypty.
Bir jaqsysy, shıkizatqa qajetti sútti alystan izdemeıdi. О́ziniń saýyn sıyrlary bar. Áleýmettik jeliden oqyp bilgen soń, arnaıy qurylǵy satyp alǵan. Aýyldy qaq jaryp Imantaý, Shalqar kýrortty ólkesine ótetin tasjoldyń boıynan ókpek jolaýshynyń izi sýymaıdy. Daıyn balmuzdaq satatyn kishkentaı dúńgirshegin qara joldyń boıyna, kólik toqtaýǵa qolaıy jerge ornatqan. Tup-týra óz úıiniń aldyna. Jaz boıy aǵylǵan jurt aýylda daıyndalǵan dámi til úıiretin balmuzdaqqa ósh. Kásibi de júrip, azyn-aýlaq qarajattyń basyn qurap alypty.
– Halyq balmuzdaqty qara qarǵanyń mıy qaınaıtyn ystyqta alady, – deıdi Erboldyń ózi, – qalǵan ýaqytta da qarap otyrmaý kerek qoı. Osy oraıda memlekettiń qamqorlyǵyna erekshe toqtalyp, aıta ketýim kerek. «Eńbek» memlekettik baǵdarlamasy arqyly 1 mln teńge qaıtarymsyz grantqa ıe boldyq. О́zge talapkerler tárizdi bıznes jospar jasadyq. Endigi maqsat – mal ónimderin uqsatý.
Aýmaǵy atshaptyrym úıiniń janyndaǵy óz otbasy buryn jeti jyl qonystanǵan eski úıdi kúrdeli jóndeýden ótkizipti. Bosaǵadan attasymen-aq uqypty qoldyń taby baıqalady. Muntazdaı tap-taza, áldeneshe bólme. Barlyǵyn óz qarajatyna jóndep, jańǵyrtqan. Qurylysshynyń qalaǵynan jańa shyqqandaı syńǵyrlap tur. Bir bólmesine grantqa berilgen qarajatqa alǵan muzdatqyshy, et týraǵyshy qoıylypty. Aldynan jumys úrkip otyratyn eńbekqor jigit óz malymen qosa aýyldaǵy aǵaıynnyń bordaqysyn satyp alyp, tushpara, manty, samsa tárizdi jartylaı daıyn ónimder ázirlemek.
– Aýyl halqy mundaı taǵamdardy ózderi-aq jasamaı ma? – dep suradyq biz.
– Osy iske bel býardyń aldynda qabyrǵamyzben keńestik, – deıdi kásipker. – Bizdiń aýyldyń biraz turǵyny oblys ortalyǵynda jumys isteıdi. Eger qajetti taǵamdy osy jerde daıyndap otyrsaq, olarǵa da qolaıly. Aldymen surastyryp kórgenbiz, onyń ústine Kókshetaý qalasyndaǵy birneshe dúkenmen aldyn ala kelisimimiz bar.
Nesi bar, el ishindegi elgezek jigitter qolda baryn kádege asyryp jatsa, jaqsylyqtyń nyshany emes pe?
Aqmola oblysy,
Zerendi aýdany