Qylmystyq ister jónindegi mamandandyrylǵan aýdanaralyq sot sottalǵan adamǵa qatysty azaptaý is-áreketterin jasaǵan Qaraǵandy oblysy jáne Ulytaý oblysy boıynsha Qylmystyq-atqarý júıesi departamentiniń aǵa ýákiletti ókiline qatysty úkim shyǵardy, dep habarlaıdy Egemen.kz oblystyq prokýratýranyń baspasóz qyzmetine silteme jasap.
Nátıjesinde, qyzmetker Qylmystyq kodekstiń 146-babynyń 2-bóligi boıynsha kináli dep tanylyp, 1 jyl 6 aıǵa bas bostandyǵynan aıyrylǵan. Sondaı-aq oǵan 3 jyl boıy memlekettik qyzmette jáne quqyq qorǵaý organdarynda qyzmet atqarýǵa tyıym salynǵan.
Sonymen qatar ol «ádilet kapıtany» arnaıy ataǵynan aıyrylyp, jábirlenýshilerge ótemaqy tóleý qoryna aıyppul tóleıdi.
«Mundaı qylmystardyń aldyn alý maqsatynda oblys prokýratýrasy QAJD qyzmetkerleri úshin sot prosesin tikeleı efırde kórsetýdi uıymdastyrdy», delingen prokýratýra habarlamasynda.
Aıta keteıik, sotqa deıingi tergep-tekserý amaldaryn oblys prokýratýrasynyń Sotqa deıingi tergep-tekserý basqarmasy júrgizgen.