Zańsyz aktıvterdi qaıtarý jónindegi komıssııa «Zańsyz ıemdenilgen aktıvterdi memleketke qaıtarý týraly» zań sheńberinde jumysyn jalǵastyryp jatyr. Barlyq qarajat áleýmettik paıdaly maqsattarǵa odan ári qaıta bólý úshin Arnaýly memlekettik qorǵa jiberiledi, dep habarlaıdy Egemen.kz Úkimettiń baspasóz qyzmetine silteme jasap.
Úkimet Memleket basshysynyń tapsyrmasy boıynsha Aqmola oblysynyń Zerendi aýylynda quny 2,1 mlrd teńge bolatyn sport keshenin jáne Túrkistan oblysynyń Temirlan aýlynda 890 mln teńge somaǵa mýzyka mektebin salý jónindegi alǵashqy eki áleýmettik jobany iske asyrýǵa Arnaýly memlekettik qordan qarajat bólý týraly sheshim qabyldady.
Máselen, Aqmola oblysynyń Zerendi aýylynda bir aýysymda 80 adamdy qabyldaıtyn sport keshenin salý josparlanyp otyr. Nysan belsendi turǵyndarǵa bos ýaqytytyn tıimdi ótkizýge múmkindik beredi – aýdanda 14,5 myńnan astam adam júıeli túrde sportpen shuǵyldanady. Jobaǵa sáıkes, ortalyq – kúres, boks, shańǵy tebý syndy sport túrlerimen aınalysý úshin jabdyqtalyp, 2 jattyǵý zaly qajetti qural-jabdyqtarmen qamtylady. Sondaı-aq keshende sportshylardy jattyqtyrý men saýyqtyrý jumystaryn sapaly ári tıimdi júzege asyrý úshin qajetti qural-jabdyq jáne basqa da qosalqy úı-jaılar qarastyrylǵan.
Túrkistan oblysyndaǵy Temirlan aýlynda 300 oryndyq jańa óner mektebin salý josparlanyp otyr. 1974 jyly qabyrǵasy karkastan salynǵan qazirgi ǵımarat zamanaýı sanıtarlyq jáne órt qaýipsizdigi talaptaryna sáıkespegendikten, kúrdeli jóndeýge jaramaıdy. Soǵan qaramastan búginde keshen jumys istep tur – ortalyqta 420-ǵa deıin bala oqıdy, bul onyń qazirgi qabyldaý múmkindiginen 2 esege artyq, 45 muǵalim sabaq beredi. Jańa joba aýylda óner salasynda qosymsha sapaly bilim alýǵa jaǵdaı jasaıdy. Balalar jaıly ortada mýzykamen, horeografııamen aınalysýǵa múmkindik alady.
Zańsyz ıemdenilgen aktıvterdi memleketke qaıtarý máseleleri jónindegi komıssııany Premer-mınıstr basqarady, jumys organy – Bas prokýratýranyń Aktıvterdi qaıtarý jónindegi komıteti.