Astananyń bes aýdanynda Respýblıka kúnine oraı shyǵarmashylyq ujymdar, oryndaýshylardyń qatysýymen konserttik baǵdarlamalar ótip jatyr. Bul týraly Astana qalasynyń ákimdigi habarlady, dep jazady Egemen.kz.
Elordanyń Almaty aýdanyndaǵy «Internasıonalnyı» turǵyn alabynda «Jastar» teatrynyń ártisteri óner kórsetti.
Al Baıqońyr aýdany «О́ndiris» turǵyn alabyndaǵy alańda Qýyrshaq teatrynyń konserttik baǵdarlamasy uıymdastyryldy. Baǵdarlamada halyq ertegileri men súıikti mýltfılmderiniń keıipkerleri kelgenderdiń kóńilin kóterdi.
Esil aýdanyndaǵy «Báıterek» monýmentiniń aldyndaǵy alańda kórermen úshin E. Rahmadıev atyndaǵy Memlekettik akademııalyq fılarmonııasy men Elordalyq sırk ártisteri óner kórsetti. Sırk ártisteri túrli-tústi akrobatıkalyq trıýkterdi, jonglerlik jáne fokýstardy pash etti.
Saryarqa aýdanyndaǵy qalalyq alańda «Joshy» etno-folklorlyq ansambli óner kórsetip, halyq aspaptarynyń súıemeldeýimen qazaq folklorynyń úzdik úlgilerin usyndy.
Nura aýdanyndaǵy Ortalyq saıabaq aýmaǵynda «Naz» memlekettik bı teatrynyń ártisteri kórermen aldynda zamanaýı jáne dástúrli bı nómirleriniń baǵdarlamasyn usyndy.
Astana qalasynyń ákimdigi Respýblıka kúnine oraı Astanada 100-den astam mádenı-buqaralyq, bilim berý, sporttyq jáne áleýmettik is-sharalar, sonyń ishinde merekelik konsertter, kórmeler, dóńgelek ústelder, ulttyq sport túrleri boıynsha týrnırler ótkizilip jatqanyn atap ótti.
Merekelik is-sharalar ortalyq alańdar men iri nysandarda, sondaı-aq turǵyn alaptardyń aýmaqtarynda, bilim berý uıymdarynda ótkizildi.
Sondaı-aq, Respýblıka kúni qarsańynda halyqtyń áleýmettik osal toptaryna myńnan astam azyq-túlik sebeti taratyldy.
Aıta keteıik, búgin saǵat 21:00-de Trıatlon saıabaǵynyń aýmaǵynda merekelik otshashý ótedi.