Soltústik Qazaqstan oblysynda áleýmettik mańyzy bar azyq-túlik taýarlarynyń saýda ústemeaqysynyń mólsherin asyrǵany úshin 124 kásipkerlik sýbektisi jazaǵa tartyldy. Olardyń 12-si mıllıon teńgege jýyq aıyppuldy tólese, qalǵandaryna ázirge eskertý jasalǵan, dep habarlaıdy Egemen.kz.
Soltústik Qazaqstan oblysynyń saýda jáne tutynýshylardyń quqyqtaryn qorǵaý basqarmasynyń basshysy Qanat Jeńisbekulynyń aıtýynsha, taýarlardyń, jumystardyń jáne qyzmetterdiń sapasy men qaýipsizdigine qatysty azamattardan aryz-shaǵymdar sany artyp keledi. Jyl basynan beri basqarmaǵa shara qoldaný týraly 400-ge jýyq ótinish túsken.
«Shaǵymdardyń jartysyna jýyǵy elektrondy kommersııaǵa qatysty. Ekinshi orynda - 28 paıyzy bólshek saýdadan, 6 paıyzy turǵyn úı-kommýnaldyq sharýashylyqtan, 3,3 paıyzy turmystyq qyzmet kórsetýden keledi. Departament tutynýshylardyń quqyqtaryn qorǵap, olarǵa 5,3 mln teńgege jýyq somaǵa aqshany qaıtarýǵa járdemdesti, onyń 2,1 mln teńgesi – bólshek saýdada, 1,8 mln teńgesi – elektrondy saýdada, qalǵan 1,3 mln teńgesi – turmystyq qyzmet kórsetýde», dedi Qanat Jeńisbekuly.
Jospardan tys tekserý nátıjeleri boıynsha QR tutynýshylardyń quqyqtaryn qorǵaý týraly zańnamasyn buzǵany úshin 13 kásipkerlik sýbektisine ákimshilik jaza qoldaný týraly qaýly shyǵarylǵan, sondaı-aq anyqtalǵan zań buzýshylyqtardy joıý týraly nusqama berilgendigi habarlandy.
«Saýda qyzmetin retteý salasyndaǵy zańnamany buzǵany úshin 125 kásipkerlik sýbektisi ákimshilik jaýapkershilikke tartyldy. Onyń ishinde áleýmettik mańyzy bar azyq-túlik taýarlary boıynsha saýda ústemeaqysynyń mólsheri men vıtrına men kassalyq chekte kórsetilgen ónim baǵasynyń aıyrmashylyǵyn asyrǵany úshin 124 kásipkerlik sýbektisi ákimshilik jaýapkershilikke tartyldy. Onyń ishinde 12 sýbekt memleketke jalpy somasy 895 310 teńgeni quraıtyn ákimshilik aıyppul tólese, qalǵandaryna eskertý túrindegi ákimshilik aıyppul salyndy», dedi basqarma basshysy.