Qasym-Jomart Toqaev Fransııa tarapynyń qazaq delegasııasyn ystyq yqylaspen qarsy alǵanyn atap ótip, Emmanıýel Makronǵa alǵys aıtty, dep jazady Egemen.kz.
«Osy saparyma aıryqsha mán beremin. Bul Qazaqstan men Fransııa arasyndaǵy strategııalyq seriktestiktiń jańa belesi bolmaq. Búgingi kelissózder jáne qabyldanatyn Birlesken deklarasııa áriptestigimizdi kúsheıtilgen strategııalyq deńgeıge kóterýge yqpal etedi. Osy oraıly sátte Sizdi Parıjde ótken otyz úshinshi Olımpıada jáne Paralımpıada oıyndarynyń tabysty ótýimen shyn júrekten quttyqtaımyn. Bul jahandyq sporttaǵy asa aýqymdy ári aıtýly oqıǵa ekeni anyq. Álem jurtshylyǵy joǵary deńgeıde ótken dodaǵa kýá boldy. Sizdiń elińiz 2030 jyly fransýz Alpilerinde jıyrma altynshy Qysqy Olımpıada oıyndaryn da tamasha deńgeıde uıymdastyratynyna senimdimin», dedi Memleket basshysy.
Qasym-Jomart Toqaev Fransııa Prezıdentiniń byltyr Astanaǵa jasaǵan sapary barysynda qol jetkizilgen ýaǵdalastyqtar men kelisimder qazaq-fransýz baılanysyn jan-jaqty tereńdetýge zor serpin bergenin aıtty.
«Qazirgi tańda memleketterimiz arasynda belsendi jáne senimdi saıası dıalog bar. Qazaqstan men Fransııa halyqaralyq sahnada tyǵyz baılanys ornatyp, kópjaqty qurylymdar aıasynda beıbitshilik pen ornyqty damý qaǵıdattaryn ilgeriletýde. Fransııa – bizdiń asa iri saýda seriktesterimizdiń biri. Sizdiń elińiz Qazaqstan ekonomıkasyna mol ınvestısııa salyp otyrǵan jetekshi elderdiń qatarynda. Búginde Qazaqstanda fransýz kapıtaly bar 200-den astam kompanııa men birlesken kásiporyn jumys istep jatyr. Qazaqstanda belsendi jumys isteýge yntaly fransýz bıznes ókilderine shynaıy rızashylyǵymdy bildiremin», dedi Qasym-Jomart Toqaev.
Qazaqstan Prezıdenti mádenı-gýmanıtarlyq baılanystar, sonyń ishinde bilim berý, ǵylym, medısına jáne tarıh salalaryndaǵy yntymaqtastyq qarqyndy damyp kele jatqanyna nazar aýdardy. Sondaı-aq álemge áıgili Gıme murajaıynda ashylǵan Qazaqstanyń ulttyq ónerine arnalǵan kórmeni aıryqsha rızashylyqpen atap ótti.
Sóz sońynda Qasym-Jomart Toqaev búgingi sapardyń qorytyndylary qos halyqtyń órkendeýine ıgi yqpal etetinine senim bildirdi.