Beıneýde alǵash ret aýdandyq kitaphana men zamanaýı talaptarǵa saı jańa kınoteatr ashylady, dep habarlaıdy Egemen.kz Mańǵystaý oblysy ákimdiginiń baspasóz qyzmetine silteme jasap.
Aıta keteıik, Mańǵystaý oblysynda ornalasqan Beıneý aýyly - elimizdegi eń iri eldi meken. 57 myń turǵyn turatyn aýyldyń jalpy aýdany 51 myń gektardy quraıdy.
Jaqyn kúnderi Beıneýde tuńǵysh ret kınoteatr ashylady. Qazirgi tańda sońǵy daıyndyq jumystary júrgizilip jatyr. Aýmaǵy 400 sharshymetr bolatyn ǵımarat 180 orynǵa arnalǵan. Bılet quny 500 teńgeden bastalady. Munda Mansap ortalyǵy arqyly jumyssyzdyq kezeginde turǵan 10 adam jumysqa alynady.
Sondaı-aq Beıneý aýdanynda alǵashqy zamanaýı kitaphananyń qurylysy qarqyndy júrip jatyr. Bul joba Memleket basshysy Qasym-Jomart Toqaevtyń jastardyń kitapqa degen qyzyǵýshylyǵyn arttyrý jónindegi tapsyrmasy aıasynda júzege asyrylyp jatyr.
Kólemi 825 sharshy metr bolatyn 2 qabatty ǵımarat bir mezette 62 adamdy qabyldaı alady. Ǵımaratta oqýshy balalarǵa, eresekterge jáne múmkindigi shekteýli adamdarǵa arnalǵan 5 oqý zaly, kitap saqtaý qoımasy men ınternet jelisimen jabdyqtalǵan arnaıy kabınetter bar.
«Jospar boıynsha qurylys jumystary 2025 jyldyń birinshi jartyjyldyǵynda aıaqtalady. Qazirgi Beıneýdiń eski kitaphanasy 218 123 dana kitap qoryn qamtıdy. Kitaphanada 62 qyzmetker jumys isteıdi. Bıyl kitaphanaǵa 89 myń adam kelip, olardyń 26 765-i turaqty oqyrman retinde tirkelgen», dep habarlady oblys ákimdiginiń baspasóz qyzmeti.