Dinderdi zertteý ortalyǵy «Han Shatyr» saýda oıyn-saýyq ortalyǵynda «Ashyq alań» kópshilikke arnalǵan aqparattyq-túsindirý aksııasyn uıymdastyrdy, dep habarlaıdy Egemen.kz.
Astana qalasy ákimdigi Din isteri jónindegi basqarmasynyń qoldaýymen uıymdastyrylǵan aksııa Qazaqstan Respýblıkasynyń 2021-2025 jyldarǵa arnalǵan Ulttyq qaýipsizdik strategııasyn, sondaı-aq ekstremızm men terrorızmge qarsy is-qımyldyń 2023-2025 jyldarǵa arnalǵan memlekettik júıesin damytýdyń keshendi josparyn oryndaý sheńberinde ótti.
«Atalǵan aksııa osymen úshinshi ret uıymdastyrylyp otyr. Buǵan deıin bul jobamyz «Arýjan» saýda úıinde, «Astanalyq bazar» aýmaǵynda ótkizip, kópshiliktiń yqylasyna bólengen edi. Búgin «Han shatyr» saýda ortalyǵynda ótkizip jatyrmyz. Negizgi maqsat – salt-dástúr, ulttyq qundylyqtar, el tarıhy men din máselelerine qatysty vıktorınalyq saýaldar uıymdastyrý arqyly jas urpaqtyń patrıottyq sezimderin oıatý. Bilim jáne tanymdyq saýaldarǵa jaýap bergen, maqal-mátelderge qatysty saıysta múdirmegen jeńimpazdarǵa basqarmanyń Alǵys haty jáne sertıfıkattar túrindegi arnaıy syılyqtar tabystalady. Budan bólek, dinı aǵymdardan saqtaný, olardyń belgileri týraly beınerolıkter kúni boıy kórsetildi. Sondaı-aq volonterlermen birlese otyryp, úsh myńǵa jýyq elordalyqtarǵa din salasyna qatysty arnaıy aqparattyq býkletterdi úlestirdik. Osy is-sharaǵa belsendi atsalysqan volonterlerdi de marapattaımyz», dedi Dinderdi zertteý ortalyǵynyń bólim basshysy Nursultan Janshın.