Jaqynda Oral qalasynda jas jubaılardyń úılený toıynda ádemi bir bastamaǵa kýá boldyq. Manarbek pen Araılym esimdi jup toı qonaqtaryna tábárik retinde kitap taratty.
Sóıtsek, «Otbasy hrestomatııasy» serııasymen 2 myń dana bolyp basylǵan «Er Edige» atty kitap dál osy jas jubaılardyń qarajatyna shyqqan eken. Toı qarsańynda Manarbek pen Araılym ózara aqyldasyp, úılený toıyna dep jınaǵan qarajatynyń bir bóligin osy kitapty shyǵarýǵa jumsapty. Kitaptyń arasynda qos ǵashyqtyń sýreti beınelengen tildeı qystyrma da júr. Onda «Mahabbattyń máni» kitabynan alynǵan «Nekeniń máni – tirshilikten hıkmet tabýda bir-birińe aınymas serik bolý» degen bir aýyz sıtata jazylǵan.
Shańyraq kóterip otyrǵan jubaılardyń kitapqa, ádebıetke qumarlyǵy tegin emes eken. Kúıeý jigit Manarbek Jumabaev – Ál-Farabı atyndaǵy Qazaq ulttyq ýnıversıtetiniń fılologııa fakýltetin, al Araılym Oljahan – Qoja Ahmet Iаsaýı atyndaǵy halyqaralyq qazaq-túrik ýnıversıtetiniń fılologııa fakýltetin úzdik bitirgen. Onyń ústine Araılym osy kitaptyń korrektýrasyn óz moınyna alypty.
«Jubaılyq ómirdiń mańyzdy kúninen osyndaı mándi estelik qaldyrýdy jón kórgen qos ǵashyqtyń shańyraǵynda Er Edigedeı urpaq dúnıege kelsin. Eki jastyń osyndaı ıgi isi ózge jandarǵa da ónege bolsyn», dedi osy toıǵa arnaıy kelgen «Otbasy hrestomatııasy» qoǵamdyq qorynyń dırektory Baǵdat Qudııar.
Ǵulama ǵalym Qanysh Sátbaevtyń ǵylymı taldaýymen jaryq kórgen bul «Er Edige» kitaby burynǵy basylymdardy qaıtalamaıdy. «Alpamys batyr» jyryn zamanǵa laıyqtap shalqyma dástúrimen qara sózge túsirgen Aqseleý Seıdimbektiń, «Er Tarǵyn» jyryn qara sózge aınaldyrǵan Muhtar Maǵaýınniń jolymen «Er Edige» jyry da jańasha túrlengen. Burynnan belgili birneshe jyr nusqasy negizge alynyp, búgingi kúnniń tildik erekshelikterine, emlesine laıyqtalǵan, biraq túpki mazmuny, Altyn Orda dáýirine tán stılıstıkasy, batyrlar jyryna tán rýhy saqtalǵan jańa dúnıe bolyp shyqqan.
Aıtpaqshy, otaý quryp jatqan balalarynyń bastamasyn olardyń ata-anasy da qoldaǵan kórinedi. Manarbektiń anasy Jarqynaı apaı ómir boıy kitaphanashy bolyp qyzmet etipti. «Balalarym kitapqumar bolyp ósse eken dep tiledim, solaı tárbıeledim. Búgin menen baqytty jan joq!» deıdi júzi bal-bul janǵan Jarqynaı ana.
Batys Qazaqstan oblysy