Tótenshe jaǵdaılar mınıstrligi elimizde órt qaýipsizdigin qamtamasyz etý boıynsha is-sharalar keshenin júrgizip jatyr. Bul týraly mınıstr Shyńǵys Árinov Premer-mınıstr Oljas Bektenovtiń tóraǵalyǵymen ótken Úkimet otyrysynda baıandady, dep habarlaıdy Egemen.kz.
TJ-ǵa jedel daıyndyqty arttyrý aıasynda Aqmola oblysynda órt sóndirýshilerden, dárigerler men qutqarýshylardan turatyn ámbebap bólimsheler qurý boıynsha pılottyq joba iske qosyldy. Bul zardap shekkenderdi qutqarý isin jedel ári keshendi túrde júzege asyrýǵa jáne olarǵa alǵashqy kómek kórsetýge múmkindik beredi. Sonymen qatar órt sóndirý depolarynyń qurylysyna jańa standarttar engizilip jatyr. Mysaly, bıylǵy tamyz aıynan bastap Astanada 3,5 aıda tez salynatyn qurylymdardan turǵyzylǵan órt sóndirý bólimshesi jumys isteıdi. Mundaı qurylys qaǵıdaty barlyq óńirde engiziletin bolady. Jalpy, elimiz boıynsha 121 órt sóndirý deposy qajet.
«Materıaldyq-tehnıkalyq qamtamasyz etýdi nyǵaıtý sheńberinde alǵash ret bıik ǵımarattardy sóndirýge arnalǵan 2 órtke qarsy dron satyp alynady. Bıyl respýblıkalyq jáne jergilikti bıýdjetter esebinen, sondaı-aq lızıngke 728 birlik arnaıy tehnıka, 18 myńnan astam qural-jabdyqtar satyp alamyz. Aýdandyq bólimshelerdiń qajettilikteri úshin tehnıkany birinshi kezekte bólemiz», dedi mınıstr.