Statıstıkaǵa súıensek, elimiz boıynsha Instagram-ǵa – 12,1 mln, Facebook-qa – 2,6 mln, al TikTok-qa 14,1 mln qoldanýshy tirkelgen. Sońǵy atalǵan jeliniń qazaq qoǵamyna qanshalyqty tamyr jaıyp úlgergenin osy derekten aıqyn ańǵaramyz. Bul platformany qoldana alsań – ıgiligiń, qoldana almasań – qıǵylyǵyń. Sondyqtan Oqý-aǵartý mınıstrligi men Ǵylym jáne joǵary bilim mınıstrligi «TikTok» jelisinde taǵylymdy kontentti nasıhattaý maqsatynda ustazdarǵa arnalǵan baıqaý jarııalady.
Atalǵan saıys úshinshi jyl qatarynan uıymdastyrylyp otyr. Jelidegi jarysqa mektep muǵalimderi, kolledj jáne joǵary oqý oryndarynyń oqytýshylary qatysa alady. Olar 3 jeltoqsanǵa deıin óz pánderine sáıkes keletin qysqa tanymdyq beınejazbany platformada jarııalaýy qajet. Beınejazbanyń uzaqtyǵy keminde 30 sekýnd bolýy tıis.
Oqý-aǵartý mınıstrliginiń baspasóz hatshysy Mereke Amangeldiqyzynyń aıtýynsha, muǵalim oqýshyǵa bilim berý úshin áýeli onyń qyzyǵýshylyǵyn oıatýy mańyzdy.
«TikTok-pen birlesken bul joba pedagogterdi shyǵarmashylyq tásilder izdeýge shabyttandyryp, bilim alýdy qyzyqty etip kórsetedi dep úmittenemiz. Vızýaldy jáne ınteraktıvti formattar ustazdarǵa aqparatty qoljetimdi ári tartymdy etip jetkizýge kómektesedi», dedi ol.
Byltyrǵy baıqaý jeńimpazdary Botagóz Omarova, Igor Gnoevoı, Haıdar Myrzahmetovtiń beınejazbalary oqýshylardyń yqylasyna ıe bolǵan edi.
«Bul maǵan dástúrli oqytý sheńberinen shyǵyp, kúrdeli taqyryptardy oqýshylarǵa túsinikti ári qyzyqty etip jetkizýdiń jolyn tabýǵa múmkindik berdi. Maǵan ásirese oqýshylarymnyń fızıkany talqylap, óz oılarymen bólisip, tájirıbelerge arnalǵan jańa ıdeıalar usynǵanyn kórý erekshe qýanysh boldy», deıdi Haıdar Myrzahmetov.