Jaqynda oblys ortalyǵynda Qazaqstannyń halyq ártisi, Memlekettik syılyqtyń laýreaty Seken Turysbek ózi jetekshilik etetin «Aqjaýyn» kameralyq orkestrimen konsert ótkizdi. Kúı óneriniń korıfeılerinen bata alyp, ónerdi ómiriniń ózegine aınaldyrǵan kúıshiniń ulttyq ónerge sińirgen eńbegi baǵalanyp, «Parasat», «Qurmet» ordenderimen marapattalǵany belgili.
Atalǵan keshte «Aq jaýyn» orkestriniń ónerpazdary óz kompozısııalarymen Semeı jurtshylyǵyn tamsandyrdy. Bıbigúl Qılymhan, Gúlnur Sargızova jáne Jiger Bertisov syndy óner ıeleri kórermenniń erekshe iltıpatyna bólendi. Buǵan qosa jerles daryn ıesiniń shashbaýyn kóterip jergilikti ónerpazdar da sazgerdiń tanymal shákirtteri qatarynda óz ónerlerin kórsetti.
Sazgerdiń shyǵarmashylyq keshine qatysqan aımaq basshysy Nurlan Uranhaev týǵan jeriniń ǵana emes, tutas qazaq balasynyń qadirlisine aınalǵan sazgerge qurmet kórsetip, jerlesteri aldynda kúıshiniń shyǵarmashylyǵy men onyń qazaq ónerine sińirgen eńbegi haqynda sóz sóılep, el aldynda abyroıyn asyrdy.
«Ákeniń qany, ananyń sútimen boıyńyzǵa daryp, súıegińizge sińgen kúı qudireti sizdi eline eleýli, halqyna qalaýly etti. Qara dombyrańyzdyń shanaǵynan shyqqan «Aq jaýyn» men «Daraboz», «Uly dala» men kóptiń júreginen oryn alǵan «Kóńil tolqyny» talǵamy bıik tyńdarmannyń kóńil pernesin dóp basty. Dana halqymyzda «Týǵan jerge týyń tik» degen ulaǵatty sóz bar. Jerlesterińiz sizdiń týǵan elińizge degen zor qurmetińizge sheksiz alǵysyn bildiredi», dedi óz sózinde oblys ákimi.
Saltanatty is-shara aıasynda elimizge belgili kásipker, mesenat Talǵat Saqan kúıshi Seken Turysbekke avtokólik mingizdi.
«Shalqyma», «Daraboz», «Qońyr», «Kók bóri», «Qosbasqan qońyr», «Saltanat», «Jolaýshy» syndy tyńdaýshylardyń kóńil shyraıyn kirgizetin týyndylar kópshilik tarazysyna usynyldy. Shyǵarmashylyq keshtiń ıesi tyńdarmandarmen syrlasyp, júregin jaryp shyqqan shyǵarmalary týraly tyńdarmandarymen syr bólisti.
Abaı oblysy