Ańyzǵa aınalǵan dara tulǵa Mustafa О́ztúrikti eske alyp, rýhyna taǵzym etip, ónegeli ómiri men eńbegin dáripteý maqsatynda velosportshy, jýrnalıst Ernat Rahmetolla 70 shaqyrymdyq velosherý ótkizdi. Astana qalasyndaǵy «Báıterekten» bastalǵan velosherýde Ernat Melsuly Qabanbaı batyr kesenesine deıingi qashyqtyqty júrip ótti.
Elimizde taekvondo federasııasynyń (WTF) negizin qalaýshy, taekvondodan 6 dúrkin álem chempıony, 6-dan qara belbeý ıegeri, halyqaralyq dárejedegi jattyqtyrýshy Mustafa О́ztúriktiń týǵanyna 70 jyl. Elimizde ǵana emes, Germanııanyń Keln, Mıýnhen, Túrkııanyń Ystanbul qalalarynda taekvondo mektebin ashqan, ana tiline qosa túrik, nemis, japon, qytaı, koreı tilderin jetik bilgen tulǵanyń qazaq sportyna sińirgen eńbegi ólsheýsiz.
«Qarashanyń qara sýyǵyna qaramastan velosherý ótkizý arqyly adamnyń múmkindikterin kórsetý, tózim, shydam, salamatty ómir salty, tabandylyq, ystyq qaıratty nasıhattap qana qoımaı, qaıratker tulǵanyń 70 jyldyǵyna ózimniń de úlesimdi qosqym keldi. Jastardy otansúıgishtikke, qaısarlyqqa úndeý maqsatynda osy sharany ótkizdim», deıdi áriptesimiz. Qazaq pen túrikke ortaq perzent sanalǵan Mustafa О́ztúriktiń ónegeli ómiri arqyly eki eldiń baýyrlastyǵyn nasıhattap júrgen jýrnalıst ıgi isi jalǵasyn tabatynyn aıtty.
Velosporttan elimizdiń 3 dúrin rekordshysy buǵan deıin de respýblıkalyq, halyqaralyq deńgeıde 14 velosherý ótkizgen. 2022 jyly 55 kúnde 5555 shaqyrym júrip, Ahmet Baıtursynulynyń 150 jyl mereıtoıyna arnap Torǵaı, Aqkól, Sarytúbekten bastap, Qostanaı, Aqtóbe, Atyraý, Mańǵystaý oblystary, Grýzııa, Túrkııa aýmaǵy arqyly Ystanbuldyń Gúneshli aýdanyndaǵy Mustafa О́ztúrik jerlengen zıratqa deıin barǵan.