Reseı Federasııasynyń Prezıdenti Vladımır Pýtın Qazaqstan Respýblıkasyna kezekti memlekettik sapary aıasynda elimizdiń bedeldi basylymdarynyń biri - «Kazahstanskaıa pravda» gazetine maqala jarııalap, eki el arasyndaǵy yntymaqtastyq týraly oıyn jetkizdi, dep habarlaıdy Egemen.kz.
«Memlekettik sapar aldynda Qazaqstannyń respýblıkalyq basylymdarynyń biri - «Kazahstanskaıa pravda» gazeti arqyly eki el arasyndaǵy tyǵyz qarym-qatynas pen yntymaqtastyq deńgeıi týraly óz oıymdy bólisýdiń sáti týyp otyr. Memleketaralyq baılanystyń joǵary deńgeıin Qazaqstan Respýblıkasynyń Prezıdenti Qasym-Jomart Kemeluly Toqaevpen birlesken jumys jyldarynda qalyptasqan tyǵyz jáne meıirimdi jeke qatynastar kýálandyrady. Biz únemi qońyraý shalyp, ártúrli formattarda kezdesemiz. Ekijaqty ózekti máselelerdi talqylap, kún tártibinde turǵan óńirlik jáne jahandyq problemalar týraly pikir almasamyz, keleshekke jańa josparlardy da belgileımiz. Eń bastysy - Qazaqstan Prezıdentimen árqashan naqty nátıjege baǵdar qoıamyz. Reseı-Qazaqstan yntymaqtastyǵynyń odan ári senimdi damýy, elderimizdiń órkendeýi, azamattardyń ómir súrý sapasyn arttyrý úshin barynsha qolaıly jaǵdaılardy qamtamasyz etý úshin qoldan kelgenniń bárin jasaýǵa tyrysamyz», dep jazdy Reseı Federasııasynyń Prezıdenti.
Vladımır Pýtın naqtylaǵandaı, búginde Reseı - Qazaqstannyń iri ekonomıkalyq seriktesteriniń biri. Al yntymaǵy jarasqan Qazaqstan men Reseı - Eýrazııalyq ekonomıkalyq ıntegrasııanyń belsendi jaqtaýshylary.
«Bizdiń memleketterimiz Eýrazııalyq ekonomıkalyq odaq qurýdyń bastaýynda turdy. Onyń sheńberinde biz taýarlardyń, kórsetiletin qyzmetterdiń sapasyn arttyryp, kapıtaldyń ortaq naryǵyn damytyp otyrmyz, retteýshilik jáne saýda kedergilerin joıý boıynsha aýqymdy jumys atqaryp kelemiz. Ortaq kóliktik-logıstıkalyq ınfraqurylymdy damytý isin de qolǵa aldyq. Munyń bári ekonomıkanyń túrli salalary boıynsha tıimdi yntymaqtastyq ornatýǵa múmkindik beredi jáne bizdiń elderimizge eleýli paıda ákeledi», delingen Reseı Prezıdentiniń maqalasynda.