«Amanat» partııasy fraksııasynyń múshesi Ekaterına Smyshlıaeva QR Qarjy naryǵyn retteý jáne damytý agenttiginiń tóraıymy Mádına Ábilqasymovaǵa derbes derekterdi qorǵaý týraly depýtattyq saýal joldady, dep habarlaıdy Egemen.kz.
Onyń aıtýynsha, qarjy uıymdarynyń qyzmetterin alýshylar qol qoıatyn kelisimder qoldanystaǵy zańnamaǵa qaıshy keledi.
«Kelisim alý rásimi is júzinde májbúrli sıpatqa ıe. Paıdalanýshy tarap kelisedi, eger kelispese, qyzmetke qoljetimdilik jabyq bolady. Kelisimderde derekterdi belgisiz maqsattar úshin óńdeýge múmkindik beretin jalpy tujyrymdar qoldanylady. Qazirgi kelisimderdiń taǵy bir belgisi – merziminiń joqtyǵy nemese negizsiz uzaq merzimde bolýy», degen E.Smeshlıaeva atalǵan másele turǵysynda taǵy birneshe jaıttarǵa toqtaldy.
Depýtattyń aıtýynsha, derbes derekter jáne olardy qorǵaý týraly barlyq talaptar zańda eskerilse de, jıi buzylyp otyr.
Osy jáne basqa da aıtylǵan jaıttarǵa baılanysty depýtat mynadaı usynystaryn ortaǵa saldy:
«Kelisimderdi alý tártibin jáne mazmunyn qosa alǵanda, bank sektorynda derbes derekterdi qorǵaý týraly zańnama talaptarynyń saqtalýyna tekserý júrgizý. Bank uıymdaryna qatysty normalardyń saqtalýyn baqylaý bóliginde qoldanystaǵy erekshelikterdi qaıta qaraý. Derbes derekterdi paıdalanýǵa salalyq kelisimderdiń biryńǵaı nysandaryn engizý múmkindigin qarastyrý. Qoljetimdilik standarttaryn, alý rásimderin engizý jáne kelisimderdi qaıtaryp alý», dep túıindedi Ekaterına Smyshlıaeva.
Aıta ketsek, depýtattar óz tarapynan QR zańdarynyń derbes derekterdi qorǵaý bóligine qosymsha ózgerister engizý boıynsha jumys istep jatyr.