Áleýmettik medısınalyq saqtandyrý qory keler jyly kórsetiletin medısınalyq qyzmetterge ótinim qabyldaý bastalǵanyn habarlady.
Qor 2025 jylǵa arnalǵan medısınalyq qyzmetter kólemin ornalastyrý rásimin bastady. Medısınalyq qyzmet kólemin bólýge memlekettik, jeke medısınalyq uıymdar qatysa alady. Medısınalyq uıymdar tegin medısınalyq kómektiń kepildik berilgen kólemi, mindetti áleýmettik medısınalyq saqtandyrý júıesi sheńberinde densaýlyq saqtaý nysandarynyń derekqoryna engen bolýǵa tıis. Sondaı-aq olar TMKKK, MÁMS aıasynda medısınalyq kómek kórsetý úshin densaýlyq saqtaý sýbektilerinen qyzmetterdi satyp alý erejeleriniń 37-1-baby 1-tarmaqshasynda kórsetilgen talaptarǵa sáıkes bolýy qajet. Áleýmettik medısınalyq saqtandyrý qory basqarma tóraǵasynyń orynbasary Svetlana Ponomareva ótinimderdiń qandaı tártippen qaralatynyn baıandap berdi.
«О́tinimderdi qabyldaý kezeńinen keıin komıssııa músheleri on kún ishinde usynylǵan qujattardyń medısınalyq kómek kólemderin ornalastyrýǵa jiberý talaptaryna sáıkestigin tekseredi. Nátıjesinde, densaýlyq saqtaý nysanynyń talaptarǵa sáıkestigi nemese sáıkes emestigi týraly hattama jasalady. Eger qandaı da bir eskertýler tabylsa, klınıkalarǵa olardy túzetýge úsh jumys kúni beriledi, sodan keıin ótinimder qaıta qaralyp, kólemderdi komıssııalyq bólý iske asady», – dedi S.Ponomareva.
2025 jylǵa arnalǵan Medısınalyq qyzmetterdi satyp alý josparyna sáıkes, medısınalyq kómek kórsetýge 2,9 trln teńgeden asa qarajat qaralǵan. Onyń 1,3 trln teńgeden astamy – mindetti áleýmettik medısınalyq saqtandyrý júıesi sheńberinde kórsetiletin qyzmetter.