Qazaqstan men Reseı 7-shi álemdik nómirleý aımaǵyn birlesip paıdalaný týraly úkimetaralyq kelisimge qol qoıdy, dep habarlaıdy Egemen.kz QR Sıfrlyq damý, ınnovasııalar jáne aeroǵarysh ónerkásibi mınıstrligine silteme jasap.
Kelisimge sáıkes, dıapazondardy bólý kelesideı anyqtaldy:
Qazaqstan Respýblıkasy +7 0, +7 6, +7 7 kodtaryn; Reseı Federasııasy +7 2, +7 3, +7 4, +7 5, +7 9 kodtaryn paıdalanady.Bul prosess tatý kórshilik jáne ózara qurmet qaǵıdattaryna negizdelgen konstrýktıvti dıalogtyń nátıjesi boldy. Qazaqstan men Reseı bólingen resýrstardy azamattardyń ıgiligi úshin tıimdi jáne ashyq paıdalaný maqsatynda tyǵyz yntymaqtastyqty jalǵastyrady.
Aıta keteıik, 2021 jyly Qazaqstanǵa jeke kod alý maqsatynda halyqaralyq telefon kody +997 rezervke qoıyldy.
Baılanys operatorlarymen jańa kodqa kóshý máselesin talqylaý barysynda, jańa kodqa kóshý múmkin ekeni, biraq birqatar qarjylyq jáne tehnologııalyq máseleler týyndaıtyny anyqtaldy.
Sonymen qatar otandyq baılanys operatorlarynyń barlyq abonentteri memlekettik jáne banktik qyzmetterdi, áleýmettik jeliler men túrli qosymshalardy alý úshin óz derekterin jańartýy qajet bolady. Osyǵan baılanysty kóshý kezeńinde aqaýlar men jaǵymsyz tájirıbeniń yqtımaldyǵy joǵary.
Osyǵan baılanysty, azamattardyń yńǵaılylyǵy úshin Qazaqstan Respýblıkasynyń Sıfrlyq damý, ınnovasııalar jáne aeroǵarysh ónerkásibi mınıstrligi Halyqaralyq elektr baılanysy odaǵymen qaıta kelissózder júrgizip, +7 halyqaralyq kodyn ózgerissiz qaldyrý týraly sheshim qabyldandy.