Túrkistan oblysynyń aýmaǵynda mal urlyǵynyń aldyn alý jáne jolyn kesý boıynsha polıseıler jedel-profılaktıkalyq is-sharalar keshenin júrgizý nátıjesinde mal urlyǵynyń tirkelimi 46,5%-ǵa tómendedi, dep habarlaıdy Egemen.kz.
Polısııa qyzmetkerleriniń jedel-izdestirý is-sharalary barysynda 15 qylmystyq toptyń qyzmeti toqtatyldy.
Mal urlyǵynyń 50 faktisine qatysy bar 35 adam qylmystyq jaýapkershilikke tartyldy. Urlanǵan maldyń 567 basy zańdy ıelerine qaıtaryldy, onyń ishinde 78-i jylqy, 107-si iri qara mal bolsa, 380-nen astamy usaq mal.
Sondaı-aq polısııa veterınarııalyq qyzmetpen birlesip urlanǵan mal men et ónimderin tasymaldaýdyń yqtımal aımaqtaryna blok-beketter ornatty.
Jaıylymdar men saýda núkteleri, bazarlar, mal soıý pýnktteri, mal men et ónimderin tasymaldaıtyn avtokólikter tekserildi. Veterınarııalyq normalardyń saqtalýyn rastaıtyn qujattarǵa baqylaý júrgizildi.
Osy baǵyttaǵy jumys nátıjesinde aýyl sharýashylyǵy janýarlaryn jaıý erejelerin buzýdyń 5781 faktisi anyqtaldy. Veterınarııa salasyndaǵy zańdy buzǵany úshin 930-dan astam adam jaýapqa tartyldy. Olarǵa qatysty 76 mıllıon teńgeden astam ákimshilik aıyppul salyndy.
Aıta keteıik, bul sharalar mal urlyǵynyń aldyn alýǵa jáne oblystaǵy quqyqtyq tártipti nyǵaıtýǵa baǵyttalǵan. Sonymen qatar halyq arasynda mal urlyǵynyń aldyn alý boıynsha aqparattyq paraqshalar taratylyp, túsindirý jumystary júrgizildi.
Polısııa mal urlyǵyna qarsy is-qımyl jáne azamattardyń senim deńgeıin arttyrý boıynsha jumysty belsendi jalǵastyrýda, bul qylmysqa qarsy kúrestiń mańyzdy aspektisi bolyp sanalady.