Dzıýdodan bıylǵy maýsymnyń eń sońǵy jarysy 7-8 jeltoqsan aralyǵynda Tokıoda ótedi. «Úlken dýlyǵa» sanatyndaǵy jarystan elimizdiń betkeustar balýandarynyń barlyǵy da bosatyldy. Olardyń ornyn qosalqy quramdaǵy sportshylar basty.
Elimizdiń erler quramasynyń bas bapkeri Nurbol Súleımenov Japonııa astanasyndaǵy jarysta Dáýren Súıekenov pen Sherzad Davlatov (60 kg), Baqytjan Ábdirahmanov (66 kg), Jalǵas Qaırolla (73 kg), Maksım Meıirlan (81 kg), Ádilet Saparǵalıev (+100 kg) syndy saıypqyrandarǵa senim artyp otyr. Olardyń barlyǵy da buǵan deıin bıik belesterdi baǵyndyrmaǵan daryndy jastar. Sondyqtan da Tokıo tatamıinde bul balýandardyń eń bolmaǵanda bireýi jeńis tuǵyryna kóterilse, sonyń ózi úlken jetistikke balanatyny haq.
Áıelder arasynda da tek elishilik jarystarda júlde alyp júrgen dzıýdoshylar beldesýge shyǵady. Bul rette bas bapker Erlan Alpysbaevtyń tańdaýy Tolǵanaı Ábeýova (52 kg), Dana Ábdirova (57 kg), Samalaı Erǵalıeva (63 kg) , Nazgúl Maratova men Karına Tákıevaǵa (+78 kg) tústi. Negizi osy dodada myqty balýandarymyzdyń biri, Azııa oıyndary men qurlyq chempıonatynyń qola júldegeri, elimizdiń birneshe dúrkin chempıony, Parıj Olımpıadasyna qatysýshy Esmıgúl Kýıýlova (63 kg) kúsh synasýǵa tıis edi. Biraq sońǵy sátte onyń Kúnshyǵys eline barmaıtyny belgili boldy.