Memleket basshysy Qasym-Jomart Toqaev Rııad qalasynda ótip jatqan One Water sammıti aıasynda Emmanıýel Makronmen kezdesti, dep habarlaıdy Egemen.kz Aqordanyń baspasóz qyzmetine silteme jasap.
Prezıdent óziniń jaqynda Fransııaǵa jasaǵan memlekettik saparyn yqylaspen eske alyp, Qazaqstan delegasııasyna kórsetken erekshe qonaqjaılyǵy úshin Emmanıýel Makronǵa rızashylyq bildirdi.
Memleket basshysy qazaq-fransýz qarym-qatynastaryn berik strategııalyq seriktestik deńgeıine jetkizý úshin Parıjde qol jetkizilgen ýaǵdalastyqtardy júzege asyrýdyń mańyzdy ekenin atap ótti.
«Kelissózderdiń qorytyndysyna jáne tıisti qujattarǵa qol qoıylǵanyna kóńilim toldy. Fransııaǵa memlekettik saparym uzaqmerzimdi ekonomıkalyq ósimge jáne elderimiz arasyndaǵy baılanysty nyǵaıtýǵa jasalǵan mańyzdy qadam boldy. Birneshe aptadan keıin-aq túrli baǵyttaǵy negizgi kelisimderdiń júzege asyp, naqty nátıje bere bastaǵany qýantady», dedi Qasym-Jomart Toqaev.
Emmanıýel Makron Qazaqstan men Fransııa arasyndaǵy yqpaldastyqtyń qarqyndy damyp kele jatqanyna toqtalyp, klımattyń ózgerýine qarsy kúres jáne «jasyl» ekonomıkany damytý sektorlarynda kúsh biriktirýdiń máni zor ekenin jetkizdi.
Taraptar energııa tıimdiligi, taza tehnologııalar, sý resýrstaryn basqarý, ınnovasııalar, derekter almasý jáne jasandy ıntellekt salalaryndaǵy yntymaqtastyqty jandandyrý perspektıvalaryn talqylady.
Kezdesýde prezıdentter óńirlik jáne halyqaralyq kún tártibindegi ózekti máseleler jóninde pikir almasty.