Táýelsizdik kúnine arnalǵan týrnırdi Joǵarǵy Sottyń Sýdıalar odaǵynyń fılıaly ótkizdi, dep habarlaıdy Egemen.kz Sottyń baspasóz qyzmetine silteme jasap.
Joǵarǵy Sottyń sýdıalary men Sot ákimshiliginiń qyzmetkerleri bılıard, ústel tennısi, shahmat jáne doıbydan saıysqa tústi.
Joǵarǵy Sot Tóraǵasy Aslambek Merǵalıev qatysýshylardy quttyqtap, týrnır áriptesterdiń salaýatty ómir saltyn ustanýyn nyǵaıta túsetinine senim bildirdi.
Sot ákimshiliginiń basshysy Naıl Ahmetzakırov barlyǵyna sáttilik pen jeńis tiledi.
Is-sharaǵa QR Ústel tennısi federasııasynyń Bas hatshysy Danıl Pak, ústel tennısinen halyqaralyq dárejedegi bas bapker Dáýlet Ysqaqov, shahmat pen doıbydan halyqaralyq dárejedegi tóreshi Bahtııar Nuǵymanov jáne bılıardtan ulttyq sanattaǵy tóreshi Erbolat Jumaǵulov qonaq retinde qatysty.
«Týrnırge qatysqan elýge jýyq qatysýshylardyń arasynda jarys qorytyndysy boıynsha jeńimpazdar anyqtalyp, olar gramotalarmen, kýboktarmen, medaldarmen jáne syılyqtarmen marapattaldy», delingen habarlamada.
Sondaı-aq, qatysýshylar bılıard boıynsha «Úzdik partııa», «Sheber qol», «Juldyzdaı jarqyldaǵan», «Utqyr taktıka», «Uqypty oıynshy», «Áserli soqqy», ústel tennısi boıynsha «Joǵary sheberlik», «Jeńiske degen ynta», «Keremet tehnıka» jáne shahmat-doıby boıynsha «Strategııalyq oıyn jáne joǵary deńgeıdegi taktıkalyq sheberlik», «Jeńiske degen tabandylyq», «Erekshe úzdik partııa» degen ataýlar boıynsha marapattaldy.