Qazaqstan Respýblıkasy Memlekettik kúzet qyzmeti Prezıdenttik orkestri halyqtyq mýzyka ansambliniń konserti osylaı ataldy
Astana qalasynda «Shabyt» Qazaq ulttyq óner ýnıversıtetiniń Jambyl Jabaev atyndaǵy konserttik zalynda Qazaqstan Respýblıkasy Memlekettik kúzet qyzmetiniń Prezıdenttik orkestri jańa maýsymyn jarııalady, ony halyqtyq mýzyka ansambliniń konserti ashty.
Halyqtyq mýzyka ansambli 1997 jyly quryldy. Bul ujym dombyra mýzykasynyń barlyq stılderi men baǵyttaryn (shertpe, tókpe), Batys, Ortalyq, Ońtústik óńirleriniń dástúrli mektepterindegi halyq ánderin oryndaý úlgilerin nasıhattaıdy, sazsyrnaı, sybyzǵy, jetigen, qylqobyz, sherter, dombyra sekildi folklorlyq-etnografııalyq aspaptarda oınaýdyń ozyq úlgilerin kórsetedi. Halyqtyq mýzyka ansambliniń quramyna halyqaralyq jáne respýblıkalyq konkýrstardyń laýreaty A.Ahmadıev, J.Muhtarov, M.Haırýshev, E.Muhamedıev, A.Ábilbekova jáne «Jetigen» dýeti, dombyrashylar trıosy kiredi.
Halyqtyq mýzyka ansambli Prezıdenttik orkestrdiń quramynda respýblıkanyń mádenı jáne mýzykalyq ómirine belsene aralasady. Halyqaralyq mýzykalyq arenada Qazaqstan atynan laıyqty óner kórsetedi. Orkestrdiń TMD memleketteri, Ulybrıtanııa, AQSh, Italııa, Malaızııa, Túrkııa, Belgııa, Avstrııa, Úndistan, Bahreın jáne basqa elderdiń sahnalaryndaǵy konsertteri tabysty ótti.
Barlyq saltanattarda ujym músheleri joǵary kásibı sheberlik baıqatady, barlyq mýzykalyq aspaptarda sheber oınaıdy. Mýzykanttar bıik rýhanılyǵymen, mýzaǵa jáne týǵan halqyna adal qyzmet etýmen erekshelenedi.
2014 jyldan beri halyqtyq mýzyka ansambline Qurmanǵazy atyndaǵy Almaty memlekettik konservatorııasynyń túlegi, búkilodaqtyq baıqaýlardyń laýreaty, «Daryn» memlekettik jastar syılyǵynyń laýreaty leıtenant Abylǵazy Ahmadıev jetekshilik etedi.
Jyl boıy aı saıyn shyǵarmashylyq ujym Astana turǵyndary men qonaqtaryna óz shyǵarmashylyǵynyń jańa týyndylaryn pash etedi. Prezıdenttik orkestrdiń quramyna úrlemeli aspaptar orkestri, halyqtyq mýzyka, kameralyq mýzyka, án jáne estrada jáne bı ansamblderi kiredi.
Bul shyǵarmashylyq ujym – álemdik mýzyka janrlarynyń folklorlyq, klassıkalyq, akademııalyq túrlerin, qazirgi zaman kompozıtorlarynyń shyǵarmalaryn oryndaıdy.
1992 jyly «Respýblıkalyq ulan týraly» Zań kúshi bar Qazaqstan Respýblıkasy Prezıdentiniń Jarlyǵyna sáıkes Qazaqstan Respýblıkasynyń hattamalyq, dıplomatııalyq, memlekettik jáne basqa da saltanatty sharalaryn qamtamasyz etý úshin Prezıdenttik orkestr qurylǵan. 1992-1994 jyldary úlgili-kórneki orkestr ataǵyna ıe boldy.
2006 jyldan bastap orkestrge P.I. Chaıkovskıı atyndaǵy Máskeý memlekettik konservatorııasynyń túlegi, búkilodaqtyq konkýrstardyń laýreaty, «Elim meniń» atty alǵashqy respýblıkalyq patrıottyq ánder konkýrsynyń laýreaty, úrlemeli aspaptar orkestrine arnalǵan partıtýranyń avtory, Memlekettik ánuran oranjırovkasynyń avtory, polkovnık Talǵat Berdiǵulov basshylyq etedi.
«Egemen-aqparat».
Sýretterdi túsirgen Erlan OMAROV.