11 jeltoqsan kúni Taılandtyń Chıangmaı qalasynda bokstan Azııa chempıonaty máresine jetti. Bokstan erler ulttyq quramasynyń bas bapkeri Qaırat Sátjanov qurlyq dodany qorytyndylap, saıys nátıjelerine qatysty pikirin aıtty, dep jazady Egemen.kz.
Bas bapker Ulttyq olımpıadalyq komıtetke bergen suhbatynda Azııa chempıonatynyń fınalyndaǵy eki báseke boıynsha tóreshiler sheshimimen kelispeıtinin atap ótti.
«Biz tek eki salmaqtaǵy nátıjege kelispeımiz: 48 jáne 71 keli. Basqa fınaldyq kezdesýlerde barlyq jeńilister ádil boldy. Men bizdiń kemshilikterimizdi baıqadym. Aldaǵy ýaqytta qateliktermen jumys isteımiz. Sonymen qatar jattyǵýlar fızıkalyq daıyndyq pen tehnıkany jaqsartýǵa baǵyttalady. Meniń oıymsha, bári de sátti bolady. Jigitterdiń áleýeti myqty, múmkindikteri mol. Sondaı-aq, Nurbek Oralbaı men birneshe boksshy jarysqa qatyspady», dedi Qaırat Sátjanov.
Bas bapker Azııa dodasynyń chempıondary men júldegerleri 1 aptadan keıin bastalatyn Qazaqstan birinshiliginen bosatylatynyn málimdedi.
«Bizde qosalqy quram myqty. Jas sportshylardy ulttyq quramaǵa shaqyramyz. Jaqynda Qazaqstan chempıonaty ótedi. Biraq oǵan ACh medalısteri qatyspaıdy, óıtkeni daıyndyq úshin ýaqyt joq. Sondaı-aq, Taılandta jeńimpaz atanǵan, el chempıonatynda jeńiske jetkender ulttyq quramanyń birinshi nómiri bolyp esepteledi», dedi bas bapker.
Aıta keteıik, Azııa chempıonatynyń fınalyna jetken erler quramasyndaǵy 9 boksshynyń tórteýi altyn medal enshiledi.